Grand Slam-in inrintawkna min siam - Swiatek

French Open champion Iga Swiatek chuan inelna lian Grand Slam nomawi chuan ken tel tam tak a nei tih a sawi a, chung zingah chuan player tan inrintawkna sang tak a siamsak tih a sawi.

Polish nula hian a vawi thum nan Roland Garros title a la, season hmasa khan US Open nomawi a chawi tawh bawk, tun hnaiah chuan hliam nei loa tournament a khelh chinah a che ṭha thei hle.

Kum 22 mi Swiatek chuan, "Tournamernt awlsam tak chu a ni lo, match khelh fuh leh fuh vak loh pawh ka nei. A bik takin final-a set ka hloh phei kha chuan hlauhthawnna a nasa hman hle bawk.

"Mahse, mak tak maiin ka vannei leh hlauh ṭhin a, ka tan chuan nomawi hlu tak a ni reng tawh ang," a ti. French Open 2023 bikah match sarih a khelh aṭangin set khat chauh a hloh a, hei hi final match-ah a ni.

Thawhṭanni tlai khan hmeichhe tennis thuneitu sang Women's Tennis Association (WTA) chuan world ranking an ti chhuak thar a, a chung berah Swiatek hi a awm chhunzawm zel, kum 2022 April 1 aṭang khan a chung berah hian a la awm zel.

Tournament an ṭan hma khan Swiatek hi a zawnin chawlhkar 60 chhung number 1 a ni a, kuminah bik Australian Open a khelh ṭhat loh bakah hliam vanga inkhelh lohna a neih nual avangin a ranking a derthawng hmang.

Swiatek chuan, "Final kan khelh dawn khan ranking chungchang an sawi ve hre ve chauh, number 1 dinhmun hloh thei ka ni tih pawh ka lo inhre lo hial. Ranking hi a pawimawh a, chutihrualin nuamti taka tennis khelh hi ka tan chuan a pawimawh ber," a ti.

July 3, Thawhṭanni aṭangin Wimbledon an khel dawn, grass court inelna lianah hian Swiatek-i a thlen san ber chu 2021 kha niin last 16-ah a tla. Polish nula hian All England Club-a inelna hi atan chona a nih leh tur thu a sawi bawk.