Durtlang North lakah Chhinga Veng chungnung

Tualchhung volleyball inelna lian Tata SK 712 Pro Volleyball League khelh laiah Chhinga Veng Spikers an chefuh. Chhinga Veng hian Thawhlehni zan khan Durtlang North chu 3-1 (24-26, 25-21, 25-18, 25-16) in an hneh.

R. Dengṭhuama Indoor Stadium, Mualpuia inkhelah Chhinga Veng tan Javed Khan chuan beiseina sang tak nena an chahluhna chu a takin a lantir, point 41 tehmeuh hlawhchhuakin D3 Business Player of the Match atan thlan a ni.

Chhinga Veng tan Javed Khan bakah point 14 neitu K. Lalfakawma, Lalbiakmuana (9 points) leh PC Lallianmawia (7) te an langsar bawk a, match hnih an khelh tawhah an chak ve ve - an chunga awm Hunthar leh Thutak Nunpuitu Team (TNT) nen an chak zat a inang.

Durtlang North hi champion lai an ni lo emaw tih mai tur an ni thung, match thum an khelh tawh chinah an la tlawm fai vek. Mizoram pawn aṭanga an chah luh Anup D Costa chuan point 20 nei mah se team chakpui nan a tawk zo chuang lo, a tihsual vangin an khingpui lamin point 13 an hmuh phah a ni.

Fabian Lallunghnema'n point 15 neiin khel ṭha viau mah se thlawptu a nei ṭha tawk lo a, an tan beisei bo vek la ni lo mah se semifinal beiseina a tlem ta hle. June 20, Thawhlehniah Tuipuiral nen an inhmachhawn leh ang.

BVT an chak

Pro Volleyball hmeichhe inelna lam pawh a hmuhnawm - Thawhlehni tlai inkhelah Bethlehem Vengthlang chuan Durtlang 3-0 (25-7, 25-12, 25-20) in an hneh a, hnehna an chan theih nana point 25 hmutu Elisian Medai chu D3 Business Player of the Match atan thlan a ni.

Champion lai BVT hi an che ṭha tawk lo, tun hnaiah Kanan leh Luangmual an ngam lo - an dinhmun derthawng deuh tawh mah se a hunah an rawn tho chhuak, match hnih an chak tak avangin table-ah pawh pathumna dinhmun an luah a, semifinal an beiseina a sang ang.

Durtlang erawh an la che fuh thei lo, match thum an khelh tawhah an la chak lo fai vek. Team paruk inel zingah a hniam ber an ni a, khelh hmabak chu la nei ve bawk mah se an tan semifinal luh phak a harsa tawh ang.