PSG-in Lee Kang-in an la lut dawn

Paris Saint-Germain chuan South Korean midfielder Lee Kang-in an lalut hnai a, Spanish club lian Atletico Madrid leh Premier League club Aston Villa pawhin an duh nia sawi ni mah se French club hi a zawm dawn niin a lang.

Italian journalist rintlak Fabrizio Romano chuan, "PSG hian Lee Kang-in hi a thuphungin inremna an neihpui tawh a, medical tihngai ṭhenkhat pawh a zo tawh. Real Mallorca nen inbiakna a kal mek a, a chiang thuai dawn e," a ti.

Khawthlang media ṭhenkhat chuan Lee-a man atan hian PSG hian euro maktaduai 15 an inseng dawn niin an tarlang a, Atletico Madrid-in an ngamna aiin euro maktaduai thum ngawtin a sang zawk - he thuziak i chhiar meuh chuan an inlalut fel tawh hial mai thei.

Real Mallorca playmaker Lee hi a tlan chak leh chet ran bakah a ball thiamna chu a larpui a ni a, season hman zawh takah khan inelna hrang hrangah match 39 khela goal ruk khungin, assist vawi sarih a nei thei a ni.

Kum 22 mi Lee hian July 2011 khan Valencia academy zawmin, December 2017 khan Valencia B team tan a khel ṭan. January 12, 2019 khan La Liga-a a match hmasa ber khelin, Valencia tan hian inelna hrang hrangah match 62 khela goal thum khungin, assist vawi li a nei.

September 2020 khan kum 19 leh ni 207 mi niin, Levante laka 4-2 a an chakna inkhelah assist vawi hnih a nei a, kum 2001 hnua La Liga match khata assist vawi hnih nei thei naupang ber record a siam.

Valencia hian contract thar zawrh mah se Lee hian a hnar avangin pre-season-ah transfer list-ah dah a ni a, Valencia-a a contract titawpin Mallorca hi kum 2021 khan a zawm a ni.

Lee hi FIFA Under-20 World Cup 2020-ah khan Best Player atan thlan a ni a, hemi kumah vek hian AFC Youth Player of the Year niin, Korean FA Young Player of the Year atan thlan a ni bawk.