Barcelona leh Vitor Roque inrem

Spanish champion Barcelona chuan Athletico Paranaense aṭangin Vitor Roque an lalut dawn. Roque lalut tur hian a khelh mekna Brazilian club nen chuan an inrem tawh a, kum 18 mi lakluh nan hian pound maktaduai 34 an hman a ngai dawn.

Catalan club striker rinrawl Robert Lewan-dowski hian kumin August thla hian kum 35 mi a thling tawh dawn - La Liga season liamta khan goal 23 lai khung thei mah se a vanglai a rei dawn tawh lo, a hmunruak luah thei tur an ngaihven a ngai tawh a ni.

Lewy thachhang-dawltu tur Roque hi 5 ft 8 in a sang a ni a, sulhnu ropui sawi tur a la nei rih lo. Athletico Paranaense tan inelna hrang hrangah match 57 aṭangin goal 16 a khungsak a, coach Xavi-a'n eng ang takin nge a chher chhuah theih ang tih kan hre thuai dawn.