Vinicius thlawp nan Brazil leh Spain inkhel dawn

A vun rawng vanga hmuhsitna tawk nasa tak Vinicius Jr. an thlawpzia lantir nan Brazil leh Spain chuan friendly match khelh dun an rem ti a, nakkum March-ah football khawvela ram ropui pahnih hian friendly match hi an khel ang.

Spanish club Real Madrid forward Vinicius hian Spain-ah hian a vun rawng avanga diriamna leh auh elna a tawk nasa ṭhin hle a, hei hi football a khelhna Spain leh an ram Brazil chuan hre rengin, an thlawpzia lantir nan friendly match hi an buatsaih dawn ta a ni.

Real Madrid khelmual Santiago Bernabeu chuan football ram ropui pahnih inkhel hi a thleng ang. Spanish Football Association president Luis Rubiales chuan, "Football-ah chi inthliarna hian hmun a chang tur a ni lo," a ti a, Vinicius an thlawp thu a sawi.

Rubiales leh Brazilian FA (CBF) president Ednaldo Rodrigues te chuan chi inthliarna dona 'One Skin' tih hming chawiin an kalpui mek a, Rodrigues chuan, "Football thuneitute hian chi inthliarna lam hawi a thlen reng rengin tun aia na zawka hremna an lek a ngai a ni.

"Sum inchawitir ringawtte hi a tawk lo a, club-te pawh hrem ṭhin an ṭul. CBF hi chu chi inthliarna chungchanga na taka hremna lekkawh hmasa ber kan ni - league-a an point hmuh zatte kan paihsak a, stadium-a ṭhutna ṭhenkhat kharsak leh dam chhung atana club member ṭhenkhat hrem thlengin kan ti vek a ni.

"He hri duhawm lo tak, football chhungkua zawng zawng min timualphotu do tur hian khawvel huapa hma kan hruai a ngai a ni," a ti a, football aṭanga chi inthliarna chu nuai bo ngei a duh.

Vinicius-a'n chi inthliarna lam hawi zawnga beih a tawh hnuhnung ber chu May thla kha niin, Real leh Valencia inkhelah auh el a ni a, hun tawp lamah red card pek a ni bawk.

Mahse, red card hi a hnuah thai bo a ni a, "He league hi chi inthliarna lam ti ṭhinte tan hmun nuam a ni," tiin a ṭawng chhuak hial a, La Liga president Javier Tebas chuan, "Thil i hriatchian hmasak phawt a ngai," tia Vinicius hi a lo chhanlet avangin dem a hlawh hle - a hnuah ngaihdam a dil thung.

Spanish FA hotupa Rubiales chuan, "Valencia-a thil duhawm lo ang kan ram ngeia a thleng hi hriatthiam a har hle. Pawi ka ti takzet - hei hi kan ram nihphung a ni lo a, khawvel huapin kan ram hmai an tibal hle a ni. Chi inthliarna hi thil ṭha lo tak a ni a, kan do tlan a ngai a ni," a ti.

Brazil hian June 17 zan dar 1:00 hian Guinea nen Barcelona -ah friendly match an khel dawn a, June 20, zan dar 12:30-ah Senegal nen Lisbon khawpuiah an inkhel leh bawk ang.