Messi hoin Argentina inlan dawn

Lionel Messi chuan Qatar World Cup kha atan chuan a hnuhnung ber a ni tih a sawi tawh a, khawvel huap ram leh ram football hmanga inelna ngaihhlut berah hian inlan leh a beisei tawh lo tih a sawi nawn - Argentina tan erawh a la inlan rih dawn; Copa America 2024 chu a khelh a la rinawm.

Mimal chawimawina ngaihhlut ber Ballon d’Or vawi sarih dawng tawh Messi hi Argentina tan a feh chhuak mek a, vawiin tlai dar 5:30 hian Workers Stadium, Beijing-ah Australia nen friendly match an khel dawn.

Tun dinhmunah Messi hi kum 35 mi a ni tawh - 2026 World Cup a thlen meuh chuan kum 39 mi a ni dawn tawh tihna a ni a, inkhelh a la chawlhsan lo a nih pawhin tleirawl thaza rual zinga inkhelh chu a harsa tawh ang.

Argentina captain Messi chuan, "Ka sawi fo tawh angin thil a la danglam lo. Qatar World Cup kha ka tana World Cup hnuhnung chu a ni tawh ang, thil thlen dan erawn kan ngaichang zel dawn - World Cup lo awm leh tur hi chu ka tan khelh beisei chi niah ka ngai tawh lo," a ti.

Ram pahnih inkhelhna tur khelmualah hian mipui 70,000 an leng a, an inkhel dawn tih a chian aṭanga hun rei lote chhungin ticket hi an hralh zo nghal vek. Chinese mite chuan world champion leh Messi hi an hmu chak takzet tih a chiang.

Argentina coach Lionel Scaloni-a'n player 27 a koh zingah hliam vangin Lisandro Martinez a tel lo - Manchester United defender bakah hian Juan Foyth, Papu Gomez, Angel Correa, Paulo Dybala leh Lautaro Martinez te hming a lang rih lo bawk.

Manchester City tana nomawi pathum chawitu Julian Alvarez erawh telh a ni a, mahse vawiin tlaia Australia nen an inkhelh hunah erawh Man City hmatawng hi a la inlan dawn rih lo - kar leh lama Indonesia nen an inkhelh hunah erawh inlan thei tawh tura beisei a ni thung.

Liverpool midfielder thar Alexis Mac Allister leh Chelsea duhlai Enzo Fernandez te an inkawp thei dawn a, anni pahnih bakah hian Rodrigo De Paul, Guido Rodriguez leh Giovani Lo Celso te an la neih bawk avangin midfield an nei ṭha tawk.

Player koh thar zingah Manchester United forward Alejandro Garnacho leh Facundo Buonanotte te an tel a, anni pahnih hian inkhel bul an ṭan phak lo a nih pawhin Argentina tana an match hmasa ber khelhna remchang an nei thei tura beisei a ni.

Argentina leh Australia inkhel tur hi a boruak a hniam vak dawn lo. Qatar World Cup last 16-ah khan an intawng tawh a, South American ram hian 2-1 a hnehna changin an champion zui bawk - tun ṭum hi an intawn lehna hmasa a ni dawn.

Australia coach Graham Arnold chuan Argentina leh Messi hi hneh let ngei an tum thu a lo sawi tawh a, an hna erawh a awlsam dawn lo. Scaloni enkawl La Albiceleste hi an ṭhat dan berin inlan thei dawn rih lo mah se Australia tan chuan hneh an la harsa deuhin a rinawm.