Spurs-in Gedson Fernandes lalut

Tottenham Hotspur-in Benfica aṭangin thla 18 chhung atan loan hmangin midfielder Gedson Fernandes an lalut. Kum 21 mi hian season liam ta khan Benfica tan khel ṭanin Spurs hian loan hun tawpah a nghetin an lalut thei ang.

Fernandes hian nikum khan Benfica hi Portuguese title a lakpui a, club tan match 53 a inlan. Spurs-in Jose Mourinho hnuaia an player lakluh hmasa ber a ni a, Moussa Sissoko a inhliam avangin an mamawh tak player an lalutah a ngaih theih.

Kum 21 mi Gedson Fernandes chuan, "Mi zawng zawngin Premier League khelh an châk a, hei hian nasa takin minti phur. Spurs inkhel hi ka en ṭhin avangin player-te pawh ka hre sa a, Mourinho pawh ka hriat sa a ni. Khawvel coach ṭha ber zinga mi a nih avangin a hnuaia awm hi footballer tam tak duhthusam a ni pha," tiin a phur hle.

Spurs hian Gedson Fernandes hi an la nghet duh a nih chuan pound maktaduai 56 bawr vel an sen a ṭul a rinawm a, chumi tur chuan Portuguese midfielder pawh a chet ṭhat a ṭul khawp ang.

Gedson Fernandes chuan, "Ka chhungte pawh London-a hnathawk turin an rawn kal a, a chhan chu Portugal-ah chuan hnathawh tur a vang. London-ah hian cham ka duh a, ka hun pum hman ka duh avangin club tan hian nitinin ka theihna zawng zawng ka chhuah ang," tiin Spurs-a awm ngheh a duh thu a sawi.