Netherlands ngamtu Croatia hmaah nomawi a inchhawp

UEFA Nations League semifinal-ah Croatia chuan 4-2 in Netherlands an hneh a, final an lut - an ram chanchina a vawi khat nan nomawi langsar chawi thei dinhmunah an ding mek.

Nilaini zan khan De Kuip, Rotterdam-ah team pahnih an intawng a, mualneitu Netherlands tan final luhna chance ṭha a ni. Mahse, hun pangngaiah 2-2 a an inhnehtawk hnuin extra time khelh a ni a, goal hnih khung belhtu Croatia an tlang.

Netherlands tan Donyell Malen chuan minute 34-na lekah goal hmahruai a khung a, Croatia hian Andrej Kramaric (penalty) leh Mario Pasalic hmangin an chhanglet a, 2-1 in inkhel hi a tawp mai dawn niin a lang hman.

Mahse, hun pek belh minute ruknaah Noa Lang chuan Dutch team tan si phurh a sut a, extra time khelh a ni - a tawpah erawh Croatia an chungnung leh ta tho a, Bruno Petkovic leh Luka Mordic (penalty) hmanga khung belhin final an lut.

Intiat tawk

Champions League final khelh aṭanga ni lina lekah Nathan Ake leh Denzel Dumfries te chu Netherlands tan an inlan nghal a, Croatia lamah Marcelo Brozovic a awm bawk - season tawpna a la rei lo bawk nen, De Kuip-a inkhel hi a tir lamah boruak a nung tawk lo.

Minute 34-naah erawh goal mawi bik kan hmu a, Dutch team ten mawi zeta ball an inpek kual hnuah Malen chuan a hmawr bawkin goal hmahruai a khung - goal dang lut loin chawlhlawk hman a ni a, Dutch team dinhmun a ṭha.

Mahse, second half ṭan aṭanga minute 10-na lekah Netherlands tan thil pawi a thleng. Liverpool forward Cody Gakpo chuan a ball ken lai chhuhsaktu Modric a titlu a, penalty a chawi.

Penalty hi Hoffenheim striker Kamaric chuan goal-ah a chantir a, minute 72-naah Pasalic chuan a belhchhah bawk - hun tawp a hnaih meuh chuan chawlhlawka hnufual team khan 2-1 in hma an hruai.

Beiseina thamral

Netherlands boss Ronald Koeman-a'n chak an mamawh tih hriain Manchester United striker pasang Wout Weghorst a luhtir a, Dutch team-in ball an vawrh nasa - hun pek belh minute ruknaah a rah an hmu a, Lang chuan si phurh sutna goal a khung.

Extra time khelh zui a ni a, mahse, Netherlands beiseina a thamral zui - extra time ṭantirha luhtir Petkovic chuan penalty box pawn aṭangin mawi zetin a khung a, United full back Tyrell Malacia chuan hlauhawm taka Petkovic titluin penalty a chawi bawk.

Minute 116-naah Modric chuan penalty hi goal-ah a chantir zui a, kum 37 mi midfielder hian Netherlands goalkeeper Justin Bijlow chu chiang zetin a bum.

Croatia-in an bu zawlah ngei Netherlands an hneh a, Nations League champion thei dinhmunah an ding mek. Dutch team erawh 1988 European Championship hnuah nomawi an la chawi leh lo.

A tawp nan

Croatia boss Zlatko Dalic chuan, "An fan-te hmaah ngei Netherlands kan hneh a, hei hi Croatian mipuite tan a ni a, medal pakhat chu kan neih belh leh ta. Thil harsa tak anga lang a ni a, mahse, kan phu hle - he result hi football chanchinah sawi a ni reng tawh ang.

"Bronze leh silver kan nei tawh a, he thawnthu ngaihnawm tak khar nan tunah chuan gold hlawhchhuah kan tum ang," a ti - Croatia hian World Cup 1998 leh 2022-ah pathumna dinhmun an luah a, World Cup 2018 final-ah France an ngam lo bawk.

Koeman tan erawh Netherlands a enkawl leh hnua match thum an khelha vawi hnih an tlawmna a ni a, March thla khan Euro 2024 qualifier-ah France chu 4-0 ngawtin an ngam lo tawh - an hneh awmchhun hi ram tenau Gibraltar (3-0) a ni.

Barcelona boss hlui Koeman chuan, "Hmasawn kan mamawhna lai pawh chiang takin a lang. He team hian thathona leh huaisenna kawngah hma kan sawn tih hmuh tur a awm a, hmasawn zel pawh kan tum ang. Mahse, tun hnai World Cup-a pathumna leh pahnihna an nih chhan pholangtu Croatia kan tum miau a, an hnen aṭangin zir tur kan nei," tiin a sawi.