Number 5 ha tur Bellingham

Jude Bellingham chuan Real Madrid-ah jersey number 5 a ha dawn - Real Madrid legend Zinedine Zidane-a hak ṭhin number a ni a, Spanish club-in English midfielder chunga beiseina an neihsanzia a lang.

Kum 19 mi Bellingham chuan, "Ka player ngaihsan em em chunga zahna lantirna a ni. Player ropui tak, a ṭha ber a ni a, mahse, kei chu Zinedine Zidane-a ropuina ang neih tuma lo kal ka ni lo - keima zinkawng ngei sial a, number 5 ropuina chhunzawm tura lo kal ka ni," a ti.
Bellingham chuan number 5 kiantu Jesus Vallejo chu fak zuiin, "Number 5 min ken avangin Jesus Vallejo chungah lawmthu ka sawi. Ani nen hian kan inbe lawk a, harsatna nei miah loin he number hi min kian a, a chungah ka lawm hle," a ti a, Real centre back chungah lawmthu a sawi.

Jersey number 22 ha ṭhin Bellingham chuan, "Number 22 ka ha ṭhin a, ka tan awmze thuk tak nei a ni. Ka thinlungah chuan number 22 ka la ni reng a, number 5 chu ka jersey hnunga inziak mai a ni.

"Kan hma hunah enge thleng zel dawn chu kan la hria ang. Tun dinhmunah chuan he number ha thei tura duhsakna ka dawng hi ka lawm êm êm a ni," a ti - Zidane khan Real tana a khelh laiin La Liga (1), Spanish Super Cup (2), Champions League (1), UEFA Super Cup (1) leh Intercontinental Cup (1) nomawi a chawi a, coach a nih hnuah Real tan a hlawhtling zawk.

Zidane hian coach a nih hnuah Real hi La Liga (2), Spanish Super Cup (2), Champions League (3), UEFA Super Cup (2) leh FIFA Club World Cup (2) ah te a champion pui.