Pep-a din 'treble champion' Manchester City

Manchester City-in an la chawi ngai loh Champions League nomawi an chawi a, European champion ni satliah loin tualchhung inelnaa nomawi ngaihhlut pahnih Premier League leh FA Cup-ah an champion tel bawk. Cityzens hi Manchester United zawha English club zinga treble champion leh thei hmasa ber an ni a, hetiang taka team ṭha bik dintu chu Pep Guardiola a ni.

Spanish manager Pep hian kum 2016 nipuiah Bayern Munich aṭangin Man City hi a zawm a, English club hian January-ah Pep an lak tur thu an sawi tawh. Cityzens-in Pep an lakluh tur thu an puan lai hian Man City hi inelna paliah an la champion vek thei a, heti chunga manager Manuel Pellegrini aia club hotuten Pep an rin chhan chu tun dinhmun an beisei vang hi a ni thei ang.

City ṭha zawk

Premier League awm hnuah Man City hi club vantlang an ni a, kum 2008-a Abu Dhabi United Group-in an lei aṭang khan team vantlang chung lamah an awm ṭan.

Arab sum mawm an chawm hma hi chuan City hian nomawi an chawi ngai meuh lo a, Premier League awm hmain 1936–37 leh 1967–68 season khan first divison-ah an champion.

FA Cup an champion hnuhnun ber ṭum pawh kum 1969 daih tawh kha a ni a, League Cup nomawi an chawi hnuhnun ber pawh kum 1976-ah daih a ni.

Mark Hughes hoin City an indinthar a, nomawi an chawi ṭan erawh Roberto Mancini hoin a ni thung. Italy coach ni ta Mancini ho hian 2011 FA Cup nomawi an chawi a, kum 2012-ah Premier League nomawi an chawi leh bawk.

Chilean manager Pellegrini-a'n kum 2013 aṭanga 2016 chhung enkawlin Premier League nomawi bakah League Cup nomawi pahnih a chawipui leh bawk. Pep-a'n English club a zawm hma hian City hi Premier League club ṭha zinga mi an ni tawh hrim hrim.

Club ṭha ber City

Kum 2016 aṭangin Pep-a hun a inṭan a, season khatnaah nomawi pakhatmah an chawi lo a, eng inelnaah mah final an thleng lo bawk. Premier League-ah pathumna an pha chauh a, Pep-a'n sawiselna a tawk.

Mahse, season hnihnaah City-in Premier League-ah point 100 tehmeuh hmuin nomawi an chawi a, League Cup nomawi an chawi bawk. 2018–19 season-ah phei chuan City hian Premier League, FA Cup leh League Cup nomawi an chawi vek a, tualchhung football an thunun hle.

2019-20 season-ah Jurgen Klopp-a kaihhruai Liverpool an rawn lang a, City-in Premier League nomawi an huhim thei lo. Pep-a hote hi an 'nil' chuang lo a, League Cup nomawi an chawi tho.

Klopp-a kaihhruai Liverpool kal vung chho mah se an elpui hi Pep-a hnuaia khel City a nih miau avangin Reds hi an ropui tur angin an ropui thei ta lo. Pep-a hnuaiah City-in a zawnin Premier League nomawi vawi thum an chawi a, season ruk chhungin vawi nga an champion.

Pep-a'n English football a thunun tih chu zep rual a ni lo a, mahse Barcelona a chhuahsan hnuah Champion League nomawi a chawi loh avangin Spanish manager hian sawiselna a tawk tho. Kuminah erawh Pep hian amah sawiseltute ka hup nan Premier League a champion pui zawhah FA Cup final-ah an hmelma Manchester United hnehin nomawi an chawi.

Champions League final-ah Inter Milan an hneh leh a, European champion ni tur hian record nei ṭha ber Real Madrid bakah club ṭha bik Bayern Munich chiang takin an hneh. Man City hian English football chauh ni loin European football thlengin an thunun ta vek.

Pep-a din

Tun ṭuma Man City player-te hi Kevin de Bruyne tih loh chu Pep Guardiola lak vek an ni a, City hian European football thunun thei tur player lak khawm nan hian pound maktaduai 770 vel an seng a ni.

Chutihrualin Pep-a vanneihna erawh player ṭha bik De Bruyne a nei hi a ni a, Spanish manager pawhin a vannei tih hi a pawm thlap. Kum 2017 daih tawh khan Pep chuan, "Player ṭha chungchuang a ni a, De Bruyne kan kawl avangin team vannei kan ni," tiin a lo sawi tawh a ni.

Pep-a'n khelh dan bik a nei a, chumi mil chuan player a la khawm. City a zawm tirh hian club legend Joe Hart chu a khelh dana a khelh theih dawn loh avangin a duh loh thu a sawi ngal a, a hun laia England no. 1 keeper Hart hian Etihad Stadium a chhuahsan phah. Goalkeeper aṭanga ball sem thei tur Claudio Bravo a lalut a, Barcelona keeper hlui hian beisei a phak loh avangin Benfica aṭangin hriat hlawh bik lo Ederson a lalut. Tunah chuan Ederson-a ball pet thiamzia hi khawvelin an hre tawh.

Pep-a'n a mamawh a hrechiang a, chutihrualin player rilru puthmang a thlir tel bawk. City hian a ṭul a nih chuan player pawimawh Leroy Sane, Ferran Torres, Joao Cancelo, Raheem Sterling, Gabriel Jesus leh Oleksandr Zinchenko te pawh an chhuah ngam. Chutiang bawkin uchuak taka sum sen ai chuan Paul Pogba leh Alexis Sanchez bakah player ṭha ṭhenkhat an lo chân tawh bawk.

Spanish manager hian tun season-a player pawimawh Erling Haaland (£51.2m) leh Manuel Akanji (£15m) te lei nan hian pound maktaduai 70 pawh a hmang tling lo. Kum 2021 nipui bazara a lakluh Jack Grealish pawh season khatnaah sawisel deuh mah se kuminah erawh player pawimawh a ni. City player hi chik lehzuala bihchian pawhin Pep-a kut hnu chiang takin a lang a, Cityzens a enkawl ṭantirha a naute a khelhtir dan leh tun season-a an khelh dan danglam tawhzia hmuh hian tactician ropui a nihzia chiang takin a lang a ni.