Europe nomawi chawipuitu Haaland

16th June, 2023

Manchester City-in 2023 Champions League final an thleng a, Premier League-a an hnuaia awm Chelsea hneh loin Thomas Tuchel-a hote nomawi chawi lai an thlir. Pep Guardiola-a'n out and out striker an mamawh tih hriain nipui bazarah Harry Kane an dawr nghal a, England captain-in Etihad Stadium pan duh mah se Tottenham Hotspur-in an chhuah phal lo.

City-in striker palian nei loin 2021–22 season an khel a, Premier League nomawi chawi mah se Champions League semifinal-ah Real Madrid an hneh lo. Nikum nipui bazarah erawh City-in an duh tak player an lalut a, July 1-ah Borussia Dortmund aṭangin Erling Haaland an la fel der.

Haaland an neih tak avang hian City hian an elpui Arsenal hnenah Gabriel Jesus leh Oleksandr Zinchenko an chhuah hial. Gunners hian hun rei zawk Premier League-ah pakhatna dinhmun an luah avangin City hian thutlukna an siam suala ngaitu pawh an awm hman a, a tawpah erawh an tihfuhzia khawvelin a hre ta thung.

Norwegian striker hian Premier league record siamin goal 36 a khung a, assist vawi riat a nei. Champions League-ah match 11-ah goal 12 khungin top scorer a ni bawk. Haaland hian goal a keng tel a ni ringawt lo a, City-in khelh dan hmang thar an neih phah.

Pep-a hnuaia khel City-in striker palian an neih miau avangin mual sir aṭangin ball an vawrh thei a, an khingpuite tan Haaland ven uluk a ṭul. Haaland hian UCL leh FA Cup final-ah goal khung lo mah se team tan a ṭangkai a, an champion-na hnar tih loh theih loh a ni.

Spanish manager Pep Guardiola chuan, "Ka hlawhtlinnaah hian ka vannei. Tun hmain Lionel Messi ka nei a, tunah chuan Erling Haaland ka nei," tiin a sawi hial - hei hian Haaland a pawimawhzia a nemnghet.

City tan Haaland hian goal a khung ringawt a ni lo a, a naupan lai aṭangin City ṭantu a ni. Haaland hi City player hlui Alfie Haaland fapa a ni a, Cityzens nen an inkawp rem thlap. Club ṭantute pawhin Haaland tana hla an phuahah 'a pa ang bawka kawr pawl hatu' an tih bakah 'Champions League min chawipuitu tur' an ti a, season khatna lekah City hi Champions League-ah a champion pui a ni.