Premier League fixture a chhuak - Burnley mualah City; Chelsea tawng tur Liverpool

European football-a league ngaihven hlawh bera chhal ngam Premier League 2023-24 fixtures chu nimin khan tihchhuah a ni ta a, match hmasa berah champion lai Manchester City leh kai thar Burnley an intawng dawn.

Team pahnih hi player leh an hlawhtlinna aṭanga khaikhin chuan inthlau viau mah se fans tam tak tan en châkawmna an nei - a chhan chu Burnley hi City legend Vincent Kompany-a enkawl an nih vang a ni.

Treble champion City hian Premier League season hnuhnung parukah vawi nga chu champion nomawi an chawi a, an thunun hneh hle - Burnley manager Kompany hian City-ah kum 11 zet hun hmangin, league title vawi li a chawipui a, August 11, zan dar 12:30-ah a club hmangaih City hi an mikhual ang.

Premier League season ṭantira en châkawm bera chhal ngam chu Chelsea-in Liverpool an mikhual tur hi a ni - team pahnih hi August 13, zan dar 9:00-ah an intawng nghal dawn a, season bul ṭan nana inhman chu an châk lo ve vein a rinawm!

Liverpool hian Premier League thuneitute hnenah khualmuala season bul ṭan an lo dil lawk a, hei hi an khelmual zauhna Anfield Road Stand lam an la zawh loh vang a ni - Stamford Bridge ber khera len nghal erawh an duhthusam a ni bik lo ang.

Chelsea hian coach thar Mauricio Pochettino hoin season tharah beiseina sang tak an nei dawn a, hetihrual hian Jurgen Klopp-a enkawl Liverpool hian Alexis Mac Allister lei tawhin inthuamṭhat zel an tum bawk - boruak a sang nghal dawn tih a chiang.

Season hman zawh taka uiawm taka champion zo ta lo Arsenal chu August 12, tlai dar 5:00-ah an inlan dawn a, Nottingham Forest an mikhual dawn avangin Mikel Arteta naute hi an match hmasa berah harsatna nei loa chak mai tura ngaih an ni.

August 12 zan dar 10:00-ah Champions League khel tur Newcastle United an inlan dawn a, Aston Villa an mikhual ang - hemi zawhah hian Manchester City leh Liverpool a zawnin an tum zui dawn a, Eddie Howe-a naute tan bul ṭan dan a hautak dawn hle.

Tottenham Hotspur chuan August 13, zan dar 6:30-ah Brentford an lenchilh dawn a, Manchester United chuan August 14, zan dar 12:30-ah Wolverhampton Wanderers mikhualin bul an ṭan ang.

Premier League hian thlasik chawlh an hmang leh dawn a, Krismas ruai ṭheh niah pawh inkhel ṭhin league hian kum thar lawmna hun thawl hek hawk an nei thei dawn - December 31 aṭanga January 12 thleng chu inkhel a awm dawn lo a ni.