Brighton tan Milner a khel dawn

Liverpool midfielder chhuah zalen tak James Milner chuan season khat chhung atan Brighton & Hove Albion a zawm a, kum 37 mi hi free transfer-in an lalut a ni.

Brighton coach Roberto De Zerbi chuan, "Brighton-a James ka lo lawm thei hi ka lawm hle. Kan squad tichhah tura player ṭha tak a ni a, level sang zawk thleng tura min puih theih ka beisei," a ti.

Manchester City tan pawha khel tawh Milner chuan, "Min sawmtu club tam tak neiin ka vannei takzet a, mahse, Brighton hian min tiphur ber tlat a ni. Brighton zinkawng thlir hian, a phurawm ka ti.

"Football hmuhnawm tak an khel a, manager Roberto lah thawhpui a châkawm êm êm bawk. Football a tuipuiin, hmasawn zel duh mi a ni a, a team remkhawm dan a ṭha êm êm bawk," a ti a, a team zawm tur coach a fak.

Milner hian Anfield-ah season riat hun hmang hmanin, nomawi langsar paruk a chawi hman a, Premier League, FA Cup, Champions League, FIFA Club World Cup, UEFA Super Cup leh League Cup-ah te a champion pui a, FA Community Shield a tel bawk.

Liverpool tan hian match 332 khel hmanin, goal 26 a khung bakah assist vawi 46 a nei a, season hman zawh takah pawh khan inelna hrang hrangah match 43 ngawt la khelin assist vawi hnih a nei - midfield leh tlarhnungah a chhawr kawp theih avangin team tan a ṭangkai hle.

Milner hian Leeds United, Newcastle United leh Aston Villa tan Premier League a lo khel tawh bawk a, a tawnhriat ringawt pawh Brighton tan a ṭangkai ang.