A zawna vawi thum chak thei TNT

Thutak Nunpuitu Team (TNT) chuan Tata SK 712 Pro Volleyball League-ah 3-0-in Tuipuiral an hneh a, match thum an khelh tawh chinah an la chak fai vek avangin semifinal lut turin an dinhmun an siam ṭha ta hle.

Nilaini zan R. Dengṭhuama Indoor Stadium, Mualpuia inkhelah Muanna Veng team TNT hian 25-16, 25-10, 25-14-in hnehna an chang a, an player ṭhenkhat siksawi ve deuh mah se Tuipuiral team lakah harsatna lian tham an tawk lo.

TNT tan inkhel bul ṭan ṭhin paruk zingah Zosangzuala leh Laldinchhunga an hahchawl a. An ṭhat dan berin inrem nghal lo mah se, an thiampuipa Vanlalṭanchhana'n point 16 hmuin ṭum thum a tisual a, inkhel tawp lama hahchawlhtir a ni chungin a vawi thum nan D3 Business Player of the Match lawmman a dawng.

Tuipuiral an che fuh hleithei lo, an match hnuhnunga Chhinga Veng Spikers an hneh loh ṭum ang bawkin Anurag Rawat-a'n thlawptu a nei ṭha tawk lo. Chutihrualin Rawat hian tihsual a nei tam an tuar ṭhin bawk, point 22 nei mah se ṭum 14 ngawt a tisual a ni.

TNT boruak a fuh laklawh - Valbuanga chauh a ni lo; K. Zodingliana'n point khat chiah hlohin ṭum kua a hlap tla a, Lalhriatpuia, Ramdinpuia leh Lalremruatsanga ten hmuhnawm khawpin an khel chhuak bawk.

League round khelh hmabak pahnih an la neihah TNT hian point khat chauh pawh an neih belh theih chuan semifinal an lut dawn chiang, an chak belh tawh lo a nih pawhin midang result a zirin an tlang thei tho - midang ngaihchan ngai lo turin point khat hmuh a tawk.

Zanin dar 8:00 hian a hmun ngaiah TNT hian Chhinga Veng Spikers an hmachhawn dawn. Spikers hi match hnih an khelh tawh china la chak ve ve an ni a, team pahnih tan tun ṭuma an inkhel tur hi fiahna a ni ang.

Luangmual an tlang

Tata SK 712 Pro Volleyball League khelh laia hmeichhe inelna lamah Luangmual an tlang fel der. PVL team thar Luangmual hian a zawna vawi thum an chakna ni turin Bungkawn chu 3-0 (25-18, 25-21, 25-21) in an hneh.

R. Dengṭhuama Indoor Stadium, Mualpuia inkhelah Luangmual an che fuh, state pawn aṭanga player lalut awmchhun an nih chu an chhawr hle bawk. Nipa Barad chuan point 22 neiin a team a chakpui a, mimal chawimawina D3 Business Player of the Match lawmman a dawng.

PVL final vawi hnih khel tawh Bungkawn hian match liah ṭum hnih chauh hnehna an chang thei a, palina an ni mek. F. Lalparmawii'n point 18 neiin thawhhlawk viau mah se thlawptu a nei ṭha tawk lo a, team a chakpui zo lo.