Brighton player man tam ber Joao Pedro

Premier League season hmasa hmang ṭha tak Brighton chuan Joao Pedro an lalut a, Brazilian forward hi pound maktaduai 30 man niin kum nga chhung atan contract a ziak a, an club player man to ber a ni.

Kum 21 mi Pedro hian season hmasa khan Championship lamah Watford tan match 35 a khelh aṭangin goal 11 a khung a, kum 21 mi chauh a la nih avangin hmabak êng tak a nei mek.

Brighton leh Pedro te hian May 5 khan inremna hi an nei fel daih tawh. Nilaini khan England ramah chuan nipui bazar hun hi a inhawng ṭan chiah a, hun a inhawn ve leh contract hi an ziak fel nghal.

Brighton technical director David Weir chuan, "Joao hi player ṭha leh hmabak nei êng tak a ni a, keini chauh ni loin European club ṭha dangte pawhin an ngaihven hle tih pawh kan hria.

"A kum la naupang deuh mah se goal hmaah a hriam êm êm a, a fingin thutlukna a siam dik ṭhin bawk. Kan tlarhma lam chu nasa takin min tichak thei ngei ang tih kan ring," tiin a sawi.

Roberto De Zerbi kaihhruaina hnuaiah Brighton hian season hmasa an hmang ṭha. Premier League-ah parukna an ni a, a vawi khat nan Europa League an khel dawn.