Manchester United dilna Chelsea lamin an hnawlsak

Manchester United chuan Chelsea hnenah an fa chuam Mason Mount chu pound maktaduai 40-a lei an va dil a, mahse an dilna hi Blues lam chuan an lo hnawlsak nghal.

Kum 24 mi Mount hian Chelsea tan kum khat daih chauh contract a nei tawh a, contract pawtsei tura inbiakna chu awm tawh mah se a hlawhtling lo, nakkuma man nei loa chhuahtir ai chuan tun hi hralh hun a ni.

England international hian Stamford Bridge chhuahsan a hreh lo tih a chiang tawh, chutihrualin a kum a la tam lo a, hmabak êng tak nei a nih avangin Chelsea chuan a manah hian pound maktaduai 70 vel tal chu an phut.

Erik ten Hag-a'n squad tih chak a tum a, player pawh a melh kual nasa. Mount pawh hi Dutch manager duh zinga mi a ni a, amaherawhchu man tlawm tak chuan an la thei dawn lo niin a lang.

Club pahnih hi an la indawr chhunzawm ang. Chelsea hian bazar hnuhnung pahnihah player lei nan pound makatduai 600 chuang an hmang a, hei vang hian 'Financial Fair Play' an bawhchhiat loh nan June 30 ral hmain an player ṭhenkhat an hralh a ngai.

Man United hian striker ṭha Harry Kane pawh an ngaihven. Mahse, England captain hi a khelh mekna Tottenham Hotspur chuan pound maktaduai 100 aia tlawm chuan hralh an tum lo - United tan hei hi a to mah mah.