Pathianni zanah Nations League Final: Croatia khingpui tur Spain

UEFA Nations League-ah Spain-in Italy hnehin final an lut a, Pathianni zan dar 12:30 hian Netherlands hnehtu Croatia nen nomawi an inchuh ang. Semifinal-a vanduai Netherlands leh Italy ten Pathianni zan dar 6:30 hian pathumna an zawng bawk dawn.

Feyenoord khelmual De Kuip, Rotterdam-ah final khelh a ni dawn. Spain hian FIFA World Cup leh European C'ship-ah te nomawi an chawi tawh a, Croatia hian nomawi lian tham an la chawi lo thung. Tu zawk pawh champion se Nations League-ah champion thar an awm ang.

Italy hnehtu Spain

Ningani zan khan Spain-in De Grolsch Veste-ah Italy an hmachhawn a, goal a lut hma hle. La Roja-in na takin an nawr nghal a, Azzurri an insiamrem thei lo. Minute thumna lekah Spain-in pressure an pek ṭhat vangin goal an khung a, captain Leonardo Bonucci-a'n hmun hlauhawmah ball hlohin Yeremy Pinto-a'n ṭha zetin a pet goal.

Italy an vannei a, an hun ṭha neih hmasak berah forward Nicolò Zaniolo chuan Real Sociedad defender Robin Le Normand kut a pet per, referee-in penalty a pe. Minute 11-naah Ciro Immobile rawn pen chhuakin keeper Unai Simon a bum a, siphurh a sut.

Italy an phur chhunzawm a, Jorginho ball pek chu Sassuolo midfielder Davide Frattesi-a'n um lutin keeper Simon-a kap karah a khung. Azzurri-in hmahruaina goal an khungah an inngai a, mahse VAR-in Spain a chhan a, offside vangin goal hi pawm a ni lo.

Spain an chungnung hret a, chance pawh an nei ṭha zawk. Mikel Merino-a'n La Roja hmahruaina theihna hun ṭha a neih chu hnai tak aṭangin goal zawnah pet mah se keeper Gianluigi Donnarumma-a'n a dang hman.

La Roja keeper Simon pawhin Frattesi goal khung tur ṭha zetin a dansak a, goal ngat se inkhel result a danglam thei hial ang. A tawp lamah Spain goal bawh a na a, Alvaro Morata hmangin Italy tlarhnung an rum ṭhaih a, minute 88-naa Joselu chakna goal erawh vanneih goal a ni.

UCL final-a goal awmchhun khungtu Rodri-a'n box pawn aṭangin a pet a, hemi per hi Joselu-a'n a khung. Espanyol forward Joselu hi offside ang lang mah se Italian defender Francesco Acerbi a inthiarfihlim hman lo - Spain an chak phah thung.

Final chu

Croatia hi langsar vut ni si loin inelna lian an tlo leh tlat zel a, kum 37 mi Luka Modric pawh a kum aṭanga teh chi a ni lo - team tan a la ṭangkai hle. Netherlands an hneh ṭumin Real Madrid midfielder hi player of the match-a thlan a ni a, a ball pass thiamna leh finna hmangin midfield a la thunun thei tlat.

Coach Zlatko Dalic pawhin, "Modric hi chu mi danglam bik a ni. Khawvel ang pawhin amah ang hi an awm lo. A kalna apiangah zah kai a ni pha a, kan thlak pawhin standing ovation an pe hial," tiin a fak.

Final-ah Modric a pawimawh leh dawn a, chutihrualin Croatia hian player dang ṭha pawh an kawl. Modric-a kawppui hi Inter Milan midfielder Marcelo Brozovic leh Chelsea midfielder Mateo Kovacic te an ni a, 'top class' vek an ni.

Chutihrualin an khingpui tur Spain hi an tlak hniam lai deuh niin lang mah se belhchian an la dawl hle. Tun dinhmuna khawvela defensive midfielder ṭha bera chhal theih Rodri an kawl a, Barcelona midfielder Gavi pawh a puitling ta hle. La Roja pawhin kum 37 bul an ṭantir a, mual dinglama awm Jesús Navas hian Europa League-ah Sevilla a champion pui thei a, ram tan pawh a la ṭangkai hle.

Luis de la Fuente hnuaiah Spain-in nomawi chawi ngei an tum dawn a, chutihrualin an squad hi Euro C'ship leh World Cup nomawi an inchawi chhawk chho lai nen chuan a inthlau ta deuh. Hemi avang hian La Roja hi Croatia aiin an buk a rit bik lo ang.