Arsenal lei dilna an hnawl phawt

Premier League club ho an bazar ṭan a, season hmasa lama champion zo ta lo Arsenal chuan West Ham midfielder Declan Rice lak tumin thapui an thawh nghal a, mahse Hammers chuan an captain lei dilna an dawn hi an lo hnawlsak.

Rice hian West Ham chu Europa Conference League nomawi a chawipui a, a khelh mekna club hian contract thar mawm ṭha zawk tak zawrh mah se a ziak duh lo, chona thar hmachhawn ngei a tum tih a chiang.

West Ham chairman David Sullivan chuan Rice chu tun nipuiah a chhuah ngei a rin thu a lo sawi tawh a, hei hi 99% a chiang a ni tih a lo sawi tawh, an midfielder ṭha hi ui viau mah se a contarct hman zawh thlenga kawl ai chuan man tam tham a nih laia hralh an hreh lo.

Mahse, England international hi kum 24 mi chauh a la ni a, hmabak êng leh theihna nei sang bik tak a nih avangin club lianin an hnena kal turin an duh a, chuvangin North London club pawhin sum an hman tam a ngai dawn.

Khawthlang media-ten an tarlan dan chuan, an indawrna hmasa an hnawl hi pound mkatduai 100 bawr vel niin an sawi. Tuna an dawrna chin nia an sawi pawh hi Arsenal player man to ber nih fal nalhna tur tham a ni tawh sa, a pun a la ngai dawn zui.

Mikel Arteta-a'n tun nipui bazarah chuan Rice hi a player lakluh duh ber nia sawi a ni. Rice bakah hian Chelsea forward Kai Havertz chu sawi rik zingah a tel bawk a, indawrna hmasa pawh a hlawhtling viau niin an tarlang.

Germany international Havertz hian Blues tan kum 2025 thleng daih contract a nei a, pound maktaduai 62.5 senga an lei hi pound maktaduai 70-in an hralh phal niin English chanchinbu Guardian chuan an tarlang.

Mahse, Blues hian an chhiarna zat hi tih hniam pawh an hre lo nia sawi a awm bawk. Transfer hnuhnung pahnihah Chelsea hian player lei nen pound maktaduai 600 chuang an hmang a, financial fair play dan bawhchhe lo turin tun nipui bazarah an inhralh ṭhen a ngai dawn.

Havertz bakah hian Mateo Kovacic chu Manchester City nen sawi zawm a ni a, an fapa duat zinga mi Mason Mount pawh Manchester United nen an indawr mek. Hliam vanga an chhawr mual tak loh N’Golo Kante chuan Saudi Arabian club Al-Itihhad a zawm bawk ang.