Durtlang North dinhmun a derthawng

Tata SK 712 Pro Volleyball League-ah champion lai Durtlang North chu semifinal thleng loa tla nghal thei dinhmunah an ding mek. Ningani zan khan Durtlang North hi Tuichangral lakah 3-2 (20-25, 25-23, 18-25, 26-24, 15-12) in an chak lo.

Tun season match li an khelh tawh chinah Durtlang North an la tlawm vek, khelh hmabak pakhat an la nei. June 20, Thawhlehni zanah Tuipuiral nen an inhmachhawn leh dawn a ni - chetsual a thiang lo ang.

An hmabakah Durtlang North tan chak ringawt a tawk dawn lo, an chak a nih pawhin an chunga awm Tuichangral an chesual vek a nih ngawt loh chuan an tan kawng a inhawng tawh lo, hming chhe taka inelna khar ai chuan chak hram a pawimawh.

Durtlang North hian Anup D Costa an nei. Karnataka captain Anup-a'n Tuichangral lakah point 40 tehmeuh a nei thei a, tihsual vawi 11 chu nei ve bawk mah se hnehna chanpui tham niin a lang, mahse team pumpui an khelh ṭhat miau loh chuan chakpui nan a tawk zo lo.

Season hmasa khan Chhinga Veng Spikers chu champion lai ni chungin an inlan a, mahse a zawnin match li an tlawm. Spikers record duhawm lo tak hi Durtlang North chuan an rawn nih rual ta chiah, khumtu nih a châkawm loh khawp ang.

PVL-ah hian a chak lamin point thum an hmu a, a chak loin point an nei lo. Mahse, set ngana (deciding) an khel a nih chuan, a chak lamin point hnih hmuin chak lo lamin point khat an hmu ve thei thung a ni.

Durtlang North leh Tuichangral ten point an insem a, hei vang hian table hmahruaitu Thutak Nunpuitu Team (TNT) chu nizana an inlan leh hmain semifinal an lut fel der tawh, an match hnuhnung lam ang bawkin player inenchhin kual nan an hmang thei ang.

Tun dinhmunah Tuichangral hi palina an ni mek, an hmabakah Chhinga Veng Spikers leh Tuipuiral te an la awm - semifinal luh leh luh loh chu anmahni kuta awm a ni a, chutihrualin vawi khat chak chauh pawh thil awlsam a ni lo tih an hrechiang hlein a rinawm.