Messi-a'n a goal rang ber a khung

Lionel Messi chuan football a khelh china a goal rang ber a khung - Argentina captain hian Australia nena friendly match inkhel ṭan aṭanga minute khat leh second 19 lekah goal a khung a, ama tana goal rang ber a ni.

China khawpui Beijing-a awm Workers' Stadium-ah mipui 70,000 an pungkhawm a, a tam zawk chuan Argentina jersey an ha, heng zingah hian Messi-a hming chuanna jersey ha an tam fal hle bawk.

Inkhel an ṭan - Australia lamah Argentine player ten ball an chang; Chelsea midfielder Enzo Fernandez chuan Messi tan ball a pe, ani hian tlanpuiin an khingpui player a bum a, an hmaah pahnih la ding mah se box pawn aṭangin a pet lut pawp.

Australia goalkeeper Mathew Ryan-a'n a zuan dik a, mahse a ban phak lo - goal chung kilah a lut. Messi-a'n ram tan a match hnuhnung pasarihah goal a khung vek, La Albiceleste tan a zawna goal a khung rei ber ṭum a ni hial.

Chawlhlawk hmain Australia tan Mitch Duke-a'n si phur sut teuh viau mah se Aston Villa goalkeeper Emiliano Martinez chuan a lo nam persak a, goal ban a per - a hnu lamah erawh South American team an dingnghet.

Substitute German Pezzella chuan minute 68-naah an goal hnihna leh chak nemnghehna ni bawk a khung. Qatar World Cup ang bawkin Argentina hian Australia lakah goal hnih an khung a, coach Graham Arnold-a nauten a chhanletna tur an nei lo.

Lionel Scaloni enkawl Argentina hian World Cup champion an nih hnuah match pathum an khel leh tawh a, an la chak fai vek. World number 1 hian June 19, Thawhṭanni tlai dar 6:00-ah Indonesia nen friendly match an khel leh ang.