Aizawl FC forward thar Rinzuala

I League club Aizawl FC-in season thar atana an player lakluh hmasak ber chu Lalrinzuala a ni a, Serchhip tlangval hi Gokulam Kerala FC, Chhinga Veng FC leh Delhi FC tan a khel tawh a ni. Aizawl FC hian FC Venghnuai aṭangin left back Lalrempuia an lalut tawh bawk.

AIFF-in tun season aṭangin state league-ah foreigner neih a phal lo a, chutihrualin season liam ta pawh khan MPL-ah chuan foreigner an awm tawh lo. AFC hi MPL9-ah league round-ah pakhatna ni mah se semifinal-ah FC Venghnuai lakah an tlawm.

I League club hian MPL nomawi neih let ngei an tum a, tualchhunga Mizo foward hming langsar ber zinga mi Rinzuala an lalut.

Bengaluru FC academy-ah Rinzuala hi kum thum awmin kum 2017 khan player of the season atan thlan a ni a, player theihna nei sang tak a ni. Season liam ta khan Rinzuala hian I Day Football-ah Chhinga Veng tan ṭha takin khel mah se MPL9-ah damlohna avangin season hun tam zawk a khel lo. Aizawl FC hian Rinzuala hi an ṭhatpui a rinawm a, chutihrualin season tluana a dam ṭhat a pawimawh tel ang.