Mizo pathum awmna India-in Asian Cup U17 khel dawn

AFC Under-17 Asian Cup 2023-a an match hmasa berah India chu vawiin tlai dar 5:30 hian an inlan dawn a, Asian football-a team ṭhangduang tak Vietnam nen an intawng ang.

India squad-ah hian midfielder pawimawh, Khawzawl rawlthar Vanlalpeka Guite, Bawngkawn winger Lalpekhlua leh striker goal khung thei bik Thanglalsoun Gangte an awm a, Mizo player pathum hian hmun pawimawh an chang phak vek.

Blue Tigers hi group D-ah awmin, Vietnam bakah Japan leh Uzbekistan an tel bawk a, an awmna group en hian India tan knockout stage lut turin zaninah chak loh a thiang lo - Vietnam hi team nem ber ang hiala chhal ngam an ni.

Mahse, India U17 hian Asian Cup khelh hmain inpuahchahna an nei ṭha a, Europe-ah tour an nei hial - Europe-ah hian team nem tum loin Spanish leh German club ṭha youth team te an khel a, an result a ṭha ṭhin hle.

India result langsar zingah Atlético Madrid U16 nen vawi hnih an inkhelha 4-1 leh 2-1 a an chak te, Real Madrid U17 nena 3-3 a an inhnehtawk chu a tel - Atletico an hneh vawi hnihah hian Peka'n goal a khung ve ve a, Thanglalsoun-a'n goal khat a khung bawk. Real nen 3-3 a an inhnehtawkah Peka leh Thanglalsoun te hian goal an khung leh bawk.

All India Football Federation general secretary Dr. Shaji Prabhakaran chuan, "Madrid-ah zinin Real president Florentino Perez hial kan hmu a, India khelhpuite hi an youth team tak tak a ni," tiin Vanglaini bulah a lo sawi tawh.

Thailand-in a thlen inelnaah hian team 16-in inelna an hmachhawn a, group paliah ṭhen hran niin, group tina a sang pahnih hian quarterfinal an lut nghal dawn a ni.

AFC U17 Asian Cup 2023-a semifinal lut chinte hi FIFA U17 World Cup 2023 khel turin an tling nghal dawn a, India coach Bibiano Fernandes chuan khawvel rawlthar ṭha rual zinga inlan phak chu an tum ber a nih thu a sawi.

Bibiano chuan, "Hnehna chan chhoh a, FIFA U17 World Cup khel tura tlin hi kan tana pawimawh ber chu a ni. Tun ang kuma World Cup kan khelh loh chuan kan ram football-in hma a sawn thei lo ang. Hmasawn zel hian kan rilru a luah a, hnehna chan pawh kan duh bawk," a ti.

India-in AFC U17 Asian Cup-a an thlen san ber chu quarterfinal a ni a, kum 2002 leh 2018 khan a thiam pariat zingah an lo tel tawh - coach Bibiano duhna tihlawhtling turin an la thlen phak ngai loh semifinal thlen a ngai dawn.