Kan chak ngei ngei a ngai - Lianzuala

Hero Intercontinental Cup khelh mekah India chuan Ningani zan khan 0-0 in Lebanon an inhnehtawkpui a, Pathianni zan dar 7:30-ah team pahnih hian champion nomawi inchuhin final an khel zui leh ang.

Kalinga Stadium, Bhubaneswar-a inkhelah Lallianzuala Chhangte chuan inkhel bul a ṭan a, Lunglei tlangval hian khelmualah hun hmang tluan mah se a vanneih zan a ni lo.

Mumbai City forward hian freekick aṭangin goal khungna remchang pawh a nei a, mahse, ISL hero of the league ni lai hian a chance neih hi uiawm takin a khung lo a, goal khung loin hun a khar.

India vanneih zan a ni lo ve hrim hrim - Lianzuala'n Anirudh Thapa leh Udanta Singh tan chance duhawm a siam sak ve ve a, mahse, player pahnih hian an hun ṭha neih an chhawr thei tlat lo.

Blue Tigers boss Igor Stimac-a'n bench-ah Sunil Chhetri a dah a, minute 81-naah Bengaluru striker hi luhtir mah se goal a ken tel bik loh avangin awmzia a nei thui lo - a tawpah draw result-a lungawi an zir.

Pathianni zana team pahnih intawn leh hunah India-in chak an duh chuan goal khung an zir a ṭul a, an chance neih an chhawr theih loh Lebanon laka tawrh nawn a rem dawn lo.

India tan hian Lza, Thapa leh Udanta bakah Ashique Kuruniyan leh Rahim Ali te pawhin chance an nei a, mahse, Lebanon goal hmaah an ke a hmui tawk lo a, India-in goal khung an harsat.

Lianzuala chuan, "Kan chance neih ho kha khung ila, hneh thei kan niin ka hria. A bik takin first half-ah khan Lebanon ai chuan kan khel ṭha zawk," tiin Vanglaini a hrilh.

Mumbai City forward Lianzuala chuan sawi zawmin, "Final-ah chuan kan chak ngei ngei a ngai a, ṭawngṭainaah min lo hre reng dawn nia," tiin Mizo mipuite ṭawngṭaipuina a ngen.