Napoli coach thar Rudi Garcia

Serie A champion Napoli chuan an coach kal chhuak ta Luciano Spalletti hmun ruak luah khat turin Rudi Garcia an lakluh thu an puang. A contract rei zawng leh a hlawh tur zat erawh chiang taka tarlan a ni rih lo.

Spalletti-a'n kum 33 hnua a vawi khat nan Napoli chu Scudetto a lakpui a, an club tan chuan chanchin lawmawm leh chhinchhiah tlak bik a ni. Mahse, an champion tih a chian aṭanga rei lotêah a hna a kalsan.

Amah thlaktu kum 59 mi Garcia hian tun hmain AS Roma a enkawl tawh - Italian football lama tawnhriat a neih bakah hian Ligue 1 club Lille a enkawl tawh a, hetah hian French Cup leh League Cup a chawipui.

Chumi hnuah Saudi Arabian club Al-Nassr a zawm a, mahse season an hman laklawh lai takin an ban. Tunah chuan Naples khawpuiah chona thar a hmachhawn dawn a, champion lai team enkawl tur a nih avangin a chungah mawhphurhna a sang dawn.

Napoli hi manager langsar tak tak - Luis Enrique, Julian Nagelsmann leh Gian Piero Gasperini te nen pawh sawizawm an ni. Garcia chuan, "Napoli hmathlir kan sawi ho a, an hmachhawp ten min tilungawi hle. Italy rama hnathawk tura ka kir thei tur hi ka lawm," a ti.

Club president Aurelio De Laurentiis pawhin an coach thar lakah beisei a nei sang a, chutihrualin an player ṭhate an chelh vek thei dawn em, tih erawh a sawi chiang thei lo thung a, tuna a lan dan chuan an chelh a rinawm loh.

Striker ṭha Victor Osimhen chu European club dangte nen sawizawm mek a ni a, defender rinrawl Kim Min-jae pawh German champion Bayern Munich nen sawizawm a ni mek - South Korean defender hi club lian dangte pawhin an rim nia sawi a ni.