US leh Mexico inkhelah player pali hnawt chhuak
Nations League semifinal inkhelah USA chuan 3-0 in an hmelma kumhlun Mexico chu an hneh a, he inkhelah hian player pali ngawt hnawhchhuah an ni a, inkhel tawp hnaih lamah inkhel tihtawp lailawk a ni bawk!
US tan 'Captain America' hminglem hial an pek Christian Pulisic chuan goal hnih khungin, Bundesliga club FC Augsburg striker Riccardo Pepi chuan goal khat a thawh bawk a, chiang takin US an chak.
Mahse, inkhelh zawhah team pahnih result aiin inkhel chhehvela thil thlengin ngaihven a hlawh zawk - Mexico centre back Cesar Montes chu minute 69-naah Folarin Balogun laka hlauhawm taka a chet avangin hnawhchhuah a ni a, hei hi red card tawpna a ni lo.
England aia US tana inlan thlangtu, a vawi khat nana USA tana inlan Balogun chunga thil thleng vanga buaina kal zelah Weston McKennie-a'n Arsenal forward Balogun hi a chhan fal deuh a, minute 71-naah red card pek a ni ve bawk.
Minute 85-naah team pahnih inkarah buaina a chhuak nawn a, Mexican left back Gerardo Arteaga leh US full back Sergino Dest te chu hnawhchhuah an ni - mawngkawhur duh lohna thu fans ṭhenkhatin an aupui avangin inkhel chawlh a ngai hial a, fans ṭhenkhat chuan an thil inna bur ruak khelmualah an vawm lut nual.
Referee pawhin minute 12 ngawt hun pek belh mah se, minute ruk vel chiah an khel hman tihin inkhel a titawp ringawt a, stadium chhungah fans ṭhenkhat chet dan avanga inkhel tihtawp theih a nih thu aupui dum dum mah se, awmzia a nei phak lo.
US midfielder Pulisic chuan, "Scoreline thlir nuam tak a ni - hnehna kan chang a, final kan lut bawk. Mahse, khatiang ang taka buaina a thleng kha pawi ka ti a, kha aia ṭha zawk khan game kha a thunun theihin ka hria.
"Thil thleng kha pawi ka ti a, insum kan harsat vek tawh avangin kan player ṭha pahnih kan chân phah bawk. Hrehawm ka ti a, mahse, a tawpah erawh final kan luh hi a pawimawh ber e," a ti.
Coach nghet nei lo US hi assistant coach B. J. Callaghan chuan a enkawl lailawk a, an coach chhuak ta Gregg Berhalter bawk chuan US hi a enkawl leh dawn nia sawi a awm.
Berhalter hian World Cup 2022-ah pawh khan US hi a kaihruai a, mahse, nikum khan a hnuaia hmun chang tam lo Gio Reyna chhungte nen an inhmu thiam lo - Berhalter hian vantlang hriatah team tana inpe tawk lo player an awm thu a sawi a, a hming tarlang lo mah se a hnuah Reyna hian amah a nih thu a sawi.
Reyna chhungte hian United States Soccer Federation be zuiin, kumk 1992 khan Berhalter hian a nupui kut a thlak thu an sawi a, US coach hian hei hi a pawm. Chhui chian ni mah se he thil thleng hian coach a nihna kawnga dal theihna dan a awm lo niin a lang a, Berhalter bawk hi US hian rawih nawn an tum.
CONCACAF Nations League final hi June 19, Thawhṭanni zing dar 6:00-ah US leh Canada ten an khel dawn. Canada hian semifinal inkhel dangah Panama chu 2-0 in an hneh a, Lille forward Jonathan David leh Bayern Munich full back Alphonso Davies ten goal khat ve ve an khung - Panama player Eric Davis chuan red card a hmu ve bawk.