Contract ka ziak kha tihsual a ni lo - Marquez

Marc Marquez chuan Repsol Honda tana a contract neih lai chu a thil tihsual a ni lo tih a sawi a, inremna a neih hnua an vanduaina tawh chhoh dan chu mihring lamin an hriat lawk bik loh thil a ni tih a sawi bawk.

Kum 2019 khan Marquez hian Honda tan kum li daih contract a ziak, inremna an ziah aṭanga thla tam a ral hmain Spanish Grand Prix an tlan - Jerez tlankawngah hian chesualin a ban ruh zai a ngai a, an zai fuh mai theih loh avangin zai nawn a ngai fo.

Khawvelah hripui Covid-19 a leng zui a, hei hian bike intlansiak khawvel pawh a chawk buai hle. Vanglai hmang chhunzawm tura ngaih Marquez hi hliam leh harsatna dang vangin a tho chhuak thei ta rih lo a, tun thlengin a dinhmun ngai a la awh leh thei lo a ni.

Spanish rider Marquez chuan, "Contract ka ziah lai khan tihsual ka neih ka hre lo, tun hnua ngun taka ka ngaihtuah pawh hian tihsual ka neih awm ka hre chuang lo, a hnu lama thil thleng hi chu thuhran daih niah ka ngai zawk.

"Ka ban a tliak dawn tih ka hre lawk lo a, hripui a rawn leng dawn tih lah hriat lawk theih a ni bawk lo. Tunah chuan mimalin harsatna ka nei leh ta a, ka taksa dinhmun hi ka duh ang taka awm a ni bik lo tih hriat a ngai.

"Team nen kan thawhhona a ṭha, tun hnaia ka hma hun zawhna ka dawn hnem avangin Honda nen kan inkar a ṭha lo tihna a ni chuang lo, a ṭha ber tur chu a rawn in herchhuak thuai turah ka ngai," tiin a sawi.

Bike intlansiakna sang ber MotoGP hi Pathianni tlai dar 5:30-ah an tlan leh dawn. Sachsenring tlankawngah German Grand Prix an tlan ang - MotoGP bikah chuan Marquez-a'n vawi riat ngawt hnehna a chan tawhna hmun a ni.