Alonso dah sangtu Verstappen

Max Verstappen chuan tun season hmang ṭha tak Fernando Alonso a dah san thu a sawi a, hun harsa karah pawh beidawng loa bei hram hram ṭhintu a ni tih a sawi chhuak.

Red Bull driver Verstappen leh a teammate Sergio Perex ten tun season intlansiak pasarih awm tawhah hnehna an la inchansem vek a, hengah te hian Aston Martin car khalhtu Alonso chu an elpui a ni.

Dutch tlangval Verstappen chuan, "Tun season chhungin keimahni ni lo midangin hnehna an chang dawn a nih chuan Alonso hi ni se ka duh, ani hian a phuin intlansiak mi dik tak a ni tih ka hrechiang hle.

"A nihna tak sawi chuan heng eng emaw lai kha chuan team laihawl ni turin car a khalh duh a, car intlansiakna sang ber hi a hmangaih tih hi a chiang takzet, tun season erawh kan chesual zeuh a nih chuan min tlanpel nghal mai ang," a ti.

Spanish driver Alonso hian 2005 leh 2006 khan F1 nomawi hi a lo chawi tawh, tunah chuan kum 41 mi ni tawhin a vanglai a pel tawh. Mahse, tun season chu beisei phak baka ṭhain a tlan - championship table-ah pathumna a ni mek.

Pathianni zan dar 11:30 hian Formula 1 Canadian Grand Prix an tlan leh dawn. Red Bull driver tu emaw zawk zawkin hnehna an chang a nih chuan, an team hian car intlansiakna sang berah a vawi 100 nan hnehna an chang thei dawn.

Verstappen-a'n hnehna a chang a nih chuan, mimala a chak tam lamah Brazilian hranghlui Ayrton Senn (41 wins) a nih rual chiah dawn. Red Bull hian intlansiak hnuhnung 26 zinga 23 tehmeuhah hnehna an chan theih avangin tun kar tawp atan pawh rin kai an ni.