Leicester manager thar tur City assistant coach

Leicester City chuan manager atan Manchester City-a Pep Guardiola assistant coach Enzo Maresca an lalut dawn. Maresca leh Foxes hian inremna an nei tawh a, he thu i chhiar meuh chuan manager a ni hial tawh ang.

Kum 43 mi Maresca hi Italian mi a ni a, a inkhelh lai chuan midfielder niin Milan youth academy-ah a awm tawh. Italian club lian Juventus leh Fiorentina te tana a khelh tawh bakah Spanish club Sevilla leh Málaga tan a khel tawh a, Greek club Olympiakos tan thlengin a khel tawh.

Maresca hi Italy senior team tan la khel lo mah se Italy youth team-ah category hrang hrangah a khel tawh. Kum 2017 khan Ascoli-ah assistant manager hna a thawk ṭan a; Sevilla leh West Ham United-ah pawh assistant manager hna thawk tawhin Pep Guardiola hnuaia a awm hma hian Parma a enkawl tawh a ni.

Nikum nipui thla khan Mikel Arteta-a'n a club hmangaih Arsenal enkawl turin City a chhuahsan a, Pep-a hnuaia awm turin Maresca-a'n City a zawm thung. Pep leh Maresca inkawp season hmasa berah City an treble champion nghal.

Leicester City-in Arsenal hnung zuiin Pep-a hnuaia inchher hriam Maresca hi an lalut chiah. Foxes hian Brendan Rodgers an ban hnuah enkawl lalawk turin Dean Smith an lalut. Smith hnuaiah Foxes hi Premier League aṭanga an tlak zui avangin English manager hi an la nghet ta lo a, Maresca chungah rinna an nghat dawn.