King Carlo hnuaiah Everton an danglam

Relegation zone-a awm hman khan Europe an sawi ri ta - Inrinni zan khan Everton chuan 3-1 in Crystal Palace an hneh a, league match nga chhung chu an tlawm tawh lo. 

Everton tan Bernard, Richarlison leh Dominic Calvert-Lewin ten goal khat ṭheuh an khung a, Palace tana Christian Benteke goal khung chu mualpho zualpui khuhtu chauh a ni. 

Carlo Ancelotti enkawlna hnuaia Everton hmasawnzia hmuh hmaih rual a ni lo a, Italian manager hi khawvela manager hlawhtling ber pawl a nih miau avangin a awm lo hran lo. 

Everton boss Ancelotti chuan, "Everton ka pan ruala kan tum hmasak ber chu Europe a ni a, tunah chuan Europa League chungchang sawi ri ngam tur kan ni ta," a ti. 

Khawvela manager hming ropui sawi a nihin Ancelotti hming lam hmaih a ni ngai lo a, amah ngaisangtute chuan 'King Carlo' tih hialin hming lem an pe. 

Manager tam tak tan Champions League final khelh pawh mang ram mai a nih laiin Italian coach hi chuan vawi thum ngawt he nomawi hi a chawi tawh a, AC Milan (2) leh Real Madrid (1) tan a champion tawh. 

Chutiang taka manager ropui ni chung chuan a club enkawl lai Napoli lama thuneitute nen an inhmuh thiam loh avangin sum tamna Premier League lam a hawi a, a thluak a la danglam lo. 

Kum 60 mi manager hnuaiah Everton-in league point 17 an hlawh chhuak tawh a, Merseyside club a pan hnua anni aia point hlawh chhuak hnem chu hmahruaitu Liverpool (24) chiah an ni. 

Ancelotti-a'n fak a hlawhna pakhat chu a huna fiamthu a thawh ṭhin hi a ni a, a player-te nen inpawh taka awm a duh avangin an bulah inla zahawm leh puithu takin a awm ngai hran lo. 

Kar hmasaa Watford an hneh hma khan Chelsea manager hlui hian a player pawimawh Walcott chu, "Theo, goal khung kan phalsak che ania," tiin fiamthuin a hrilh!

Walcott chuan, "Kha thu khan minti nui a, ka hahdam phah bawk. Arsene Wenger nen khan an inang ka ti a, kan ngaihtuahna kan sen thar theihna tur thu an sawi reng mai a ni," a ti. 

Everton hian Watford lakah hian 3-2 in hnehna an chang a, Walcott-a'n a puin a phalsak ang ngeiin minute 90-naah goal a khung bawk - Inrinni zana Palace an hnehna inkhela goal hmahruai assist tu chu Theo bawk a ni. 

Bayern Munich leh Paris Saint-Germain pawh lo enkawl tawhtu Carlo hian a ngaihpawimawh tak pakhat chu 'inrintawnna' a ni a, chu thil chu coaching staff leh player-te inkarah awm se a duh. 

Carlo hian a player-te chu zan lenchhuah pawh khap loin a phalsak a, a pawimawh ber erawh "Zan lenchhuah pawhin a tukah training tura a hun taka thlen tur," tih a ni thung. 

Marco Silva hnuaia training rei tak an neih ṭhin chu Ancelotti hian a tih tawisak a,  mahse an hun hman rei lote erawh a hlawk thei ang bera hman a duh thung. 

Ancelotti bulah chuan player-te an thlamuang a, an chetsualin a sawisel duh ngai lo - Newcastle laka 2-0 a hma an hruai reng hnua 2-2 a nih pawhin Liverpool laka Champions League final-a a lo chetsual tawhna a sawi mai a, "Kan thunun theih loh thil hi a awm ve bawk a ni," tiin hahdam takin a pawm mai!

Serie A Coach of the Year atana ṭum hnih thlan lo ni tawh Ancelotti hnathawhna kawngah lam hmaih thiang lo pahnih an awm a, a assistant leh a fapa ni bawk  Davide Ancelotti leh Duncan Ferguson te an ni. 

Ancelotti lo thlen hmaa Everton formation 4-2-3-1 hmansa thlak danglama 4-4-2 hmangtu chu khatihlaia manager lailawk Duncan Ferguson a ni a, Carlo pawhin he formation hi a hman uar sa a nih avangin a ring zui. 

Italian coach hian winger-te chu khelmual laia tlan lut tam turin thu a pe a, hei vang hian full back an neihte chu tlanchhuahna hun tam a pe leh chiah bawk. 

Everton hi an 'ṭha famkim' tia sawi tur erawh an la ni hauh lo a, Carlo ngei pawhin hei hi a pawm - mahse thlasik chawlh an nei ang a, an dik tawk lohnate insiamṭhat tumin ke an pen zel ang. 

Team an chet ṭhat dawn chuan tlarhmaah player inkawp rem bik leh hmuhnawm an awm a ngai ṭhin. European club hlawhtling tak takte sulhnu en ila, player inkawp hmuhnawm bik sawi tur an nei zel.

Everton tana Calvert-Lewin leh Richarlison inkawp hi 'top class' huang chhunga la dah chi ni lo mah se an hmuhnawmzia erawh phat theih a ni lo tih a lang chiang a, Merseyside club hian chet ṭhat an tum zel chuan player pahnih hi an pawimawh dawn chauh.

Ancelotti hnuaia inelna hrang hranga match kua a khelhah Calvert-Lewin hian goal ruk a khung tawh a, Richarlison-a'n tun season-a match 29 a khelh aṭangin goal 11 a khung tawh bawk. 

Calvert-Lewin chuan, "Kan inpui tawn a, khelmual pawn lam thleng pawhin kan inngaina em em a ni," tiin Richarlison nena an chungchang a sawi a, Carlo hnuaia he team hmasawnna hi Chelsea, Tottenham Hotspur, Manchester United leh Arsenal tan hmuh nuam a ni lo ang.