TNT hnung zuitu Hunthar

Tata SK 712 Pro Volleyball League khelh laiah Inrinni zan khan Hunthar chuan inkhel hmuhnawm takah Tuipuiral 3-2 a hnehin semifinal an inhlangkai a, khelh hmabak pahnih la nei mah se a thiam pali zingah an tel dawn tih a chiang tawh.

Thutak Nunpuitu Team (TNT) chu semifinal lut hmasa ber an ni a, an match lina an khelh hmain an tlang tih a chiang tawh. Semifinal an lut chiang tawh tih hresa chungin Chhinga Veng Spikers chu 3-1 a hnehin a chung berah awmhmun an sawhnghet.

Hunthar an ṭha

R. Dengṭhuama Indoor Stadium, Mualpuiah volleyball ngainatu tam tak an pungkhawm a - TV leh YouTube lam aṭanga thlirtu an tam bawk, mipuiin an hmuh châk ang ngeiin inkhel hmuhnawm chhawp chhuahsak an ni bawk.

Tuipuiral tan 6ft 5in zeta sang Anurag Rawat a che na hle, point 54 teh meuh hlap chhuakin tun season Pro Volleyball khelh laiah match khata point nei hnem ber a ni hial a, a vawi hnih nan D3 Business Player of the Match lawmman a dawng.

Mahse, volleyball hi mimala innghat ngawt a ni lo a, hnehna chang tur chuan player zawng zawng an khelh ṭhat a ngai. Tuipuiral tan Anurag Rawat bak chu point 10 nei tling thei an awm miah lo, a tawpah an tuar ta a ni.

Hunthar lamin tun inelna bikah a zawna set hnihna an hloh ṭum tawng mah se, setter Remsangzuala a hmuhnawm - tawnhriat nei ṭha Lalramnunfela leh Laldensanga te tan ball a siamsak hnem a, anni hian an lo tihlawhtling tam ve bawk.

Set hnuhnung ber an khelh thlengin, team thar Tuipuiral tan Anurag bak ball pek ngam an nei lo va, set lina tir lam aṭangin Hunthar nih rual phak loin a umtuah an ṭang tluan ta a ni. An match lehpeka Durtlang North an tum hunah chetsual a thiang tawh lo ang.

TNT=100%

Pro Volleyball season dangah chuan Mizo hlanga khel tan champion beisei ngam chi a ni ngai lo, volleyball ang bawkin tualchhung basketball inelna sang Mizoram Super League-ah pawh state pawn player nei ṭhate an chungnung ṭhin.

Mahse, tun season PVL zet chu thawnthu a danglam mek - Mizo hlanga khel Thutak Nunpuitu Team (TNT) an hmuhnawm a, an hmaa ding apiang an hneh zel - a zawnin match li an chak ta; Chhinga Veng Spikers chu 25-20, 17-25, 25-22, 25-23 in an hneh.

TNT hian player langsar an nei, a hming chu Vanlalṭanchhana a ni. Valbuanga'n Chhinga Veng lakah point 22 a hlap chhuak leh thei a, match hmasa dang ang bawkin an chakna hnar pawimawh a ni leh chiang hle.

Chutihrualin, TNT tan Valbuanga bakah player dang an khel ṭha ṭhin. Point 19 neitu Laldinchhunga a hmuhnawm a, an setter Lalliankima hming lam hmaih a thiang lo bawk, ani hi an chakna tura midang remchang siamsaktu pawimawh a ni.

Makima hian inkhel kalphung a hre êm êm a, ball dawnsawn harsa deuh tura ngaih pawh awlsam hmel takin a la thei. A defending a ṭha tel a, an spiker-ten an hlap theihna turin hmun awl remchang laia ball siamsak thiam bik a nihna chu a ṭangkai thei hle.

Semifinal-ah Kanan an lut 

Tata SK 712 Pro Volleyball League hmeichhe inelna lamah Kanan chuan Power Department Sporting Club chu 3-0 (25-12, 25-20, 25-21) a hnehin semifinal an lut a, tun season kal laia nomawi pathum chawi an tumna chu an la chhawmnung zel.

Tih dik a pawimawh tluk zetin tihsual neih tlem a pawimawh - Kanan player pawimawh Lalramliani'n point 10 a hlawh chhuah theih laiin vawi khat chiah a tisual a, a phu ang ngeiin D3 Business Player of the Match lawmman a dawng zui.

Kanan hian match thum an khelh tawhah hnehna an chang vek a, point kua hmuin table hmahruaitu an ni - pahnihnaah kaithar Luangmual an awm, anni pawh hian point kua ve bawk an hmu a, semifinal an lut chiang tawh bawk.

PVL 2017 champion Power Dept. erawhin chak ni hmel an lo hmu lo a, hmeichhe champion hmasa ber tan semifinal beiseina la tawp vek lo mah se a tlem tawh hle. Player chhuak thar ṭha an kawl loh avangin an tan a harsa tawh tih chiang takin a lang.