RFYC Inter District C'ship an zo fel; Under 13 champion Champhai 'B'

Reliance Foundation Young Champs leh Mizoram Football Association buatsaih Naupang League Inter District Championship 2022-23 chu June 17, Inrinni khan RG Stadium-ah khelh zawha ni. Under 13 inelnaah hian Champhai 'B' (BOR, Champhai District) an champion.

RFYC Naupang League 2022-23 hi nikum November 19 aṭang khan khelh ṭan a ni a, age category pali Under 7, U9, U11 leh U13-ah an ṭhen hrang. District paliah Naupang League hi kalpui a ni a, Aizawl leh Champhai district-ah te hian category tinah team 12 ṭheuh awmin, match 33 an khel. Lunglei leh Kolasib district-ah category tinah team pariat ṭheuh an awm a, match-24 an khel thung.

RFYC Inter District Championship-ah hian league champion team leh league aṭanga player thlan chhuah (Best of the rest) te an inel. Under 13 final-ah Champhai 'B'-in hun tawp hma hret a H. Vanlalmalsawma goal hmangin Aizawl 'B' 1-0 in an hneh a, an champion.