India-ah Mama a champion

Yonex Sunrise 2nd Ashwini Gupta Memorial All India Sub-junior Ranking Badminton Tournament 2023-ah Mizo naupang Malsawmhlua (Mama) chu Under-15 Boy's Doubles inelna huangah a champion a, India ram pum inelnaah Mizo naupang hming a mawi leh ta.

Panchkula, Haryana-a neih inelnaah hian Mama hi Andhra Pradesh lam mi Mahendra Kalahasthi nen inkawpin, seeded no 2 an ni a, final-ah hian seeded no. 1 Arjun Tanaji Birajdar leh Aryan Tanaji Birajdar te ṭang dun chu straight set in, 21-14, 21-18 in an hneh a ni.

June 11-18 inkara neih inelnaah Mama te hian semifinal-ah player ṭha Akhil Reddy Bobba leh Abhisek Bonu, Andhra Pradesh te ṭang dun chu an hneh bawk.

Serchhip naupang Mama hi Ralte Villa Badminton Club, Champhai tana khel mek niin, Pullela Gopichand Badminton Academy (PGBA), Hyderabad-ah badminton zirin a awm mek a ni.

Mama hi NEIDA (Tata Trust), Mizoram Badminton Association leh Mizoram State Sports Council-te thawhhonaa din Serchhip Regional Development Centre (RDC) aṭanga zir chhuak niin, November 2021 aṭang khan PGBA-ah hian a awm ṭan a, India rama naupang, badminton lama hmabak nei êng berte zinga mi a ni.

MBA chuan thuchhuah siamin, "Mama hlawhtlinna hi kan chhuangin kan lawmpui takzet a, Mizoram tihmingṭha a, India player chhuanvawr ni chho zel turin duhsakna sang ber kan hlan a ni," an ti.