Inter District tournament-ah Kolasib champion

Cricket Association of Mizoram buatsaiha neih 2nd Inter District Cricket Tournament final chu Inrinni khan khelh a ni a, champion lai Kolasib District chuan an champion nomawi humhim turin Siaha District chu wicket riatin an hneh.

Ṭhuamluaia Field, Lungleia inkhelah Siaha lam an vannei hmasa - ṭhumvawrah vanneiin, bat hmasak an thlang a, over 19.2-ah run 96 siamin an out vek! Ruah surin inkhel a tihbuai zui avangin inkhelh chhunzawm lawk theih a ni lo.

Ruah sur vangin Duckworth–Lewis–Stern method hman zui a ni a, Kolasib lam hi over 5-ah target 31 tuksak an ni - Kolasib hian over thum lekah run 34 siamin an target an um pha a, wicket hnih chiah an hloh.

Kolasib tan Nasib Rai chuan over liah run 23 lek pea wicket li lain man of the match atan thlan a ni a, Sagar Rai chuan ball kua a hmachhawnah run 16 siamin a tawp thleng a dam bawk.

Kolasib manager VL Hmangaihzuala chuan, "Kan inbuatsaihna a ṭha a, kan champion nomawi humhim ngei tumin Lunglei kan pan a, kan tumnate kan tihlawhtling thei hi kan lawm takzet. Kan coach R.Lalnuntluanga inpeknain fak a phu bawk.

"Kawng engkima min thlawptu Kolasib district mipui, kan hruaitute leh sum leh pai thawhtute zawng zawng chungah lawmthu kan sawi a ni," tiin Vanglaini a hrilh a, bialtu MLA K. Lalrinliana chungah lawmthu a sawi bawk.