AFC Under-17: India an chak zo lo
AFC Under-17 Asian Cup 2023-a an match hmasa berah India-in hnehna an chang zo lo a, Vietnam nen 1-1 in an inhnehtawk - Blue Tigers hmabakah champion lai Japan leh Uzbekistan an la awm a, India tan kalkawng a awlsam dawn lo.
Thailand-a neih inelnaah hian India hi an match hmasa berah chak tura beisei an ni a, mahse, goal an chhuah hmasa zawk - Asian football-a ram ṭhangduang tak Vietnam tan Long Vu chuan minute 44-naah goal hmahruai a khung a, Blue Tigers an hawihai.
Mahse, Europe-a tour nei zo hlim India-in Thailand-ah a tikim tura kal ngawt an ni bik lo tih an pholang a, minute 69-naah Malemngamba Thokchom chuan box pawn aṭangin si phurh sutna goal a khung - hun tawp thlengin goal dang a lut lo a, 1-1 in an inhnehtawk.
India tan Vanlalpeka Guite (Sentea) leh Lalpekhlua te an inlan a, player pahnihin first half-ah freekick hmangin chance nei mah se an chhawr lo.
Khawzawl rawlthar Sentea'n ṭum danga a game a phak lo em ni chu aw, tih tur a ni a, Bawngkawn winger Peka hmuhnawm ṭhin mah se a hmawr a bawk ṭha tawk ṭhin lo - India innghahna player pahnihten insiamrem an mamawh.
India coach Bibiano Fernandes-a'n rin loh takin goal khung khawl Thanglalsoun Gangte chu bench-ah a dah a, Mizo striker hi bench aṭanga luhtir a nih hnuah India game a nung sawt.
Thanglalsoun che vel a hmuhnawm a, Vietnam tlarhnung tan buaipui tham a ni - Vietnam keeper Nguyen Bao Ngoc pawh khan hmachhawn nawn a châk lo ang!
SAFF Championships 2022 leh AFC U17 Qualifier-a India captain Sentea chuan, "Kan rilru hian a ngam laklawh tawh a, kan beisei angin goal kan khung thei lo zawk a ni," tiin Vanglaini a hrilh a, chak beiseia inkhel an nih thu a sawi.
India tana thil lawmawm erawh group D lama inkhel hmasa zawkah Japan leh Uzbekistan chu 1-1 in an inhnehtawk ve tho - group khat aṭangin team pahnihin quarterfinal an lut dawn a, Blue Tigers tan beisei a la sang tihna a ni.
Mizo pathum awmna India hian June 20 zanah Uzbekistan an hmachhawn zui leh ang a, June 23-ah Japan nen an inkhel leh bawk ang - an hmabak match-ah an tlawm loh chuan quarterfinal luhna chance a sang.
Khawzawl rawlthar Sentea chuan, "Eng pawh thleng thei a ni a, kan hmabaka la awm team pahnih hi team ṭha tia hriat an ni a, kan hmachhawn châk tawh zawk - chak pawh kan inbeisei ngam," tiin Vanglaini a hrilh a, ram ṭha tia sawi pahnih hi a huphurh bik lo.
Sentea chuan European tour an neih khan a puih nasat thu sawiin, "Kan la tawn ngai miah loh kan tawng thar a, pressure sang tak tak tawnhriat kan neih phah a, tun inelna atan hian min tuaihriam phah hle," a ti.
India coach Bibiano chuan, "First half-ah khan ball kan chang tam zawk a, mahse, an tlarhnung kan su hawng thei tlat lo. First half-ah Vietnam khan an tlarhnung an venghim ṭha a, chance an insiam bawk. Ka ngaihdanah chuan a 50/50 viau a ni.
"Keini pawhin chance kan insiam a, chak thei zawk dinhmunah kan ding ve ve. 1-1 hi result chhia a ni hran lo a, tunah chuan hmabak kan thlir ang," a ti a, chak zo lo mah se a naute khelh danah a lawm tawk.