Number 10 thar Arnold hoin Three Lions an chak

Liverpool full-back Trent Alexander-Arnold chuan England tan number 10 hain, midfield laiah a khel a, goal a khung - Three Lions hian Euro 2024 qualifying round-ah Malta chu Zirtawpni Zan khan 4-0 in an sawp.

England tan Arnold bakah Ferdinando Apap (own goal), Harry Kane (penalty) leh Callum Wilson (penalty) ten goal khat ṭheuh an khung a, mualneitu Malta lamin a chhanletna tur an nei lo.

Three Lions hi zanin dar 12:15-ah an inlan zui leh dawn a, group C inkhelah North Macedonia an hmachhawn ang - England hian match thum khelh tawh aṭanga point kua nei tawhin, an la chak vek a ni.

Number 10 chu

Liverpool right back Arnold ball pet thiamzia leh tlarhma puih kawnga a ṭhatzia chu hriat sa a ni - season tawp lamah Jurgen Klopp-a'n midfield-a duhthala tal turin zalenna a pe a, a tihfuhzia chu Liverpool fan-te a hrechiangtu an ni.

England boss Gareth Southgate pawhin a defending ṭhat tawk loh vanga sawisel tawk ṭhin Arnold hi bench-a dah mai loin, number 10 a hak tir a, Malta lakah a enchhin - a tisual lo.

Liverpool right back hian Bukayo Saka leh James Maddison tan ball ṭha tak tak a 'supply' reng a, an goal hmahruai pawh Arnold-a ke aṭanga chhuak a ni - Saka tana a ball pek ṭha zet chu Arsenal forward hian Kane tan a siamsak a, mahse, Tottenham Hotspur striker-in a khawih hmain Malta defender Apap chuan an lamah a tilut.

Arnold-a 'goal'

Minute 28-na a ni a, Arnold-a'n an goal hnihna a khung - box pawn aṭangin kum 24 mi right back hian ṭha zetin a thlawh lut a, Malta keeper Henry Bonello tan tih theih dang a awm lo.

Malta an insiamrem hman lo. Matthew Guillaumier-a'n Kane a tihtluk avangin penalty a chawi a, Real Madrid nena sawizawm Kane hian Three Lions tana friendly match ni loa a goal 50-na khung nan a hmang.

Kane lakchhuah a nih hnuah amah thlaktu Callum Wilson chuan penalty a hlawh chhuak ve leh a, a ball cross chu Malta captain Steve Borg chuan a kutin a lo khawih fuh - Wilson hian goal-ah a chantir zui a, 4-0 in England an chak.

England tan Eze

Crystal Palace tana season duhawm tak hmangtu midfielder Eberechi Eze chuan England tana a match hmasa ber a khel a, minute 70-naah Maddison a thlak - a tan chuan zan chhinchhiah tlak a ni.

Eze hian Euro 2020 khelh kha beisei viau mah se hliam vangin a inlan thei lo a, kum hnih hnuah a beisei êm êm England tan a inlan ve ta. Kum 24 mi Eze hian season hman zawh takah khan Palace tan league match 38 khel kim vekin goal 10 a khung a, assist vawi li a nei.

England tan Eze a inlan a, Arnold-a'n number 10-ah a tifuh viau bawk - mahse, Malta aia ram langsar zawk lakah eng nge a an zel dawn, tih chu thil hriat châkawm a ni.

Arnold & Southgate

England tana midfield-a inlan Arnold chuan, "Midfield-ah hian ka khel tam lo a, mahse, nuam ka ti khawp mai. Ka tih ṭhan ang maiin ka khel thei a, ka khelh chhunzawm zel theih pawh ka ring.

"Ram tana inlan zel hi ka duh a, ka bul ṭan dan a chheloin ka hria. Club football-a ka khelh dante nen pawh thil thar a ni a, thil sawi duah hun a la ni lo. Match khat chauh a la ni a, mahse, hun ṭha ka neih erawh ka chhawr zel a ṭul," a ti.

England boss Southgate chuan, "A ti thei ang tihah hian ka ringhlel ngai lo. He role-in a ken tel ṭhenkhat zir belh zeuh a ngai a ni mai. Midfield-a khelh hi nuam a ti a, kar li liam ta khan phone-ah kan lo sawi dun daih tawh - a theihna tak tak a pholang a ni," tiin a sawi.