Fernandes hoin Portugal an chak

Euro 2024 qualifying-ah Portugal tan Bruno Fernandes a inlar a, an ram hi Bosnia-Herzegovina lakah 3-0 in a chak pui. Group J-ah match thum khel tawhin an la chak fai vek.

Inrinni zan inkhelah Manchester United midfielder Fernandes hian Bernardo Silva khung tur a siamsak hmasa phawt a, chumi hnuah goal hnih a khung zui, anmahni mual Estadio da Luz-a inkhel an ni bawka harsatna an tawk lo.

Portugal tan hian captain Cristiano Ronaldo chuan inkhel bul a ṭan a, ram tana a match 199-na a khel. Al Nassr forward hian March thla khan Euro Championship qualifier-ah a zawnin match hnihah goal a khung, tun ṭumah erawh a goal khung chu offside vanga hnawl a ni.

Ronaldo-a'n Portugal tan match 199 aṭangin goal 122 a khungsak tawh a, ram tan ani aia goal khung hnem an awm lo. Thawhlehni zanah Iceland an lenchilh dawn, he hunah hian Ronaldo hian a match 200-na a khel a nih chuan mellung pawimawh tak a ni ang.