Kha le Zion fapa...aw khaih! Lunglei tlangval zawk!

Kalinga Stadium, Bhubaneswar a ni a, inkhel en turin mipui 12,600 zet an pungkhawm - chutah chuan tlangval pakhat a awm. A duh danin ball a tlanpui a, Lebanese tlangval khan sang pui pui chu a duhna lamah a thlektir a, a duh hunah a tlanpel a!

Chu ennawm ropui tak chu Indian football ngainatuten hmuhnawm ti takin an thlir a, a ni, khawdang hawisan an phal lo - ennawm puanzar khar a nih hma loh chuan. Chu ennawm pholangtu, a changtupa chu Lallianzuala Chhangte a ni.

Pathianni zan khan Hero Intercontinental Cup final-ah India chuan 2-0 in Lebanon an hneh a, Lianzuala'n goal khat a khung bakah Sunil Chhetri khung tur a siamsak bawk - India an champion.

Lunglei tlangval hi hero of the match atan thlan a ni zui a, India-in Intercontinental Cup-a match li a khelh aṭangin match hnihah hero of the match a ni thei - Lunglei tlangval hian Indian football-ah thawnthu ngaihnawm a hnutchhiah zel e.

Thu rum chu

Inkhel ṭantir lamah India-in bul rawn ṭan 'hot' viau mah se zawi zawiin an game hmuhnawmna a bo a, Lebanon lamin tlarhnung venhim an ngaih pawimawh bawk si avangin Blue Tigers an che hleithei lo.

Mikhual team-in chance an nei hleithei bik lo a, Soony Saad leh Hassan Maatouk ten chance nei mah se an hun ṭha neih an chhawr bik lo - Kalinga Stadium-ah team pahnihin mipui beisei ang ennawm an chhuah thei lo a, chawlhlawk hman a ni.

Chawlhlawk laiin India-in thu ṭha an ngaithla - India captain Sunil Chhetri chuan, "Thil tam tak sawi a ni a, a ṭhen chu sawi chhawn chi pawh a ni lo," a ti a, coach Igor Stimac-a chawlhlawk thusawi a rum thu a sawi.

Lianzuala pawhin, "Chawlhlawk laia kan thu ngaihthlak a rum ṭha bawk a, second half kha chu danglam tawh tak a ni," tiin Vanglaini a hrilh a, second half-a inkhel hmuhnawm an phochhuahna kawngah Coach thusawi a pawimawh thu a sawi lang.

A mawi a mawi!

Second half-ah Kalinga Stadium nghawr nghing turin India-in an nghah rei a ngai tawh lo. Minute 46-naah team goal kan hmu a, Indian player-te thiam tawhzia pawh hmuh turin a awm tel nghal.

Lianzuala'n ṭha taka ball tlanpuiin Nikhil Poojary a pe a, Mumbai forward hi ball pek turin a tlan lut nghal - hemi hmutu Hyderabad FC winger Poojary hian Lebanon player kap karah mawi zetin a kheng lut a, Lianzuala ke bulah bawk ball a awm zui.

Lunglei tlangval hian chak taka ball tlanpuiin, a duh thala Lebanon tlarhnung a bum hnuah Sunil Chhetri tan a siamsak a, India captain tan goal-a chantir turin harsatna a awm tawh lo - ram tana goal 87 a khungna chiah a ni.

Chhetri hian international football-a goal khung hnem palina Mokhtar Dahari tluk turin goal hnih khung chiah a mamawh tawh. International football la khel mek zingah Cristiano Ronaldo (122 goals) leh Lionel Messi (103) te chu goal khung tam lama a tluk loh awmchhun an ni mek.

Hei le Lianzuala

India an inthlahdah lo - na takin Lebanon an nawr zui a, Jeakson Singh leh Sandesh Jhingan ten chance duhawm nei mah se an hun ṭha neih an chhawr thei lo thung. Uiawm takin goal bar chungah an tauh ve ve.

Minute 65-na a ni a, Lebanon an vanneih reng a rem lo. Chhetri-a'n Naorem Singh tana a siamsak chu Manipur tlangval hian shot nghalin Lebanon keeper Ali Sabeh chuan a lo dansak.

Mahse, Sabeh ball dan per bula ding Lianzuala rang takin a che a, ISL hero of the league ni lai hian ISL player ṭha bera an thlan kha tihpalh thil a ni lo, tih pholangin, an goal hnihna a khung.

A tlan chak êm avanga 'Mizo Flash' hming lem an pek Lianzuala'n India tan match 23 a khelha goal ruk a khungna chiah a ni a, Mizo tlangval hian Mumbai City tana season duhawm tak a hman chu Blue Tigers jersey ha chung pawhin a chhunzawm zel.

Pathian awmpuina

Lianzuala chuan, "Pathian awmpuina a ni. First half-a kan khelh dan ngaihtuah chuan khatianga kan khar kha ka ring êm êm lo. Mahse, second half kan ṭan chhoh hnu leh kan tih goal hnu kha chuan kan chak ngei ka ring tawh.

"A tir aṭanga a tawp thlengin tha thlah lovin kan ṭang tluan thei a, kha khan nasa takin min pui a ni," tiin Vanglaini a hrilh a, second half-a an khelh dan avanga chak an nih thu a sawi.

Lunglei forward chuan a mimal khelh dan chungchang sawi zuiin, "First half-ah ka duh angin ball ka chang tam tawk lo a, duhthusamin ka khel thei lo. Mahse, second half-ah chuan ball ka chang tam deuh a, ka duh danin ka khel theiin ka hria.

"Inkhel boruak sangah hi chuan danglamna thlentu nih hi a harsa ṭhin a, mahse, Lebanon laka kan chak theih nana tha ka thawh ve thei kha ka lawm khawp mai," tiin Vanglaini a hrilh - India squad-ah hian Lalengmawia Ralte (Apuia) chu squad-a Mizo awm ve dang a ni.

Hello SAFF!

India hian nimin khan SAFF Championships 2023 khelhna tur Bengaluru khawpui an pan nghal a, Nilaini zan dar 7:30-ah Pakistan nen an inkhel lehnghal dawn - chawlhna hun an nei lo tihna a ni a, vawiinah training neih lehnghal a ngai.

SAFF Championship-ah hian ram pariatin inelna an hmachhawn dawn - SAFF ram India, Nepal, Pakistan, Maldives, Bhutan leh Bangladesh bakah Kuwait leh Lebanon chu inelna hmachhawn tura sawm an ni.

Team pariatte hi group pahnihah ṭhen hran niin, team pali ve ve an awm a, an inkhelh kual hnuah group pahniha a sang zawk pahnih ve ve hian semifinal an lut ang.

Blue Tigers hi group A-ah Kuwait, Nepal leh Pakistan te nen an awm ho a, vawi 14 champion nomawi chawi tawh India tan beiseina a neih san ngam.

India-in sum an dawng hnem

Hero Intercontinental Cup-a an champion avangin India hian US dollar 50,000 (Rs.40,95,240) an dawng a, inelna thlengtu Odisha chief minister Naveen Patnaik chuan Blue Tigers champion lawmpuinan cheng vaibelchhe khat a hlan bawk.

Patnaik chuan, "Intercontinental Cup kan lo thleng thei hi kan state tan chuan thil lawmawm tak a ni. Inelna hautak êm êma an champion theih avangin India ka lawmpui a, Odisha chuan football match tam tak thlen zel a, Odisha leh India a football a ṭhan zel theih nana tha thawh ve kan duh a ni," a ti.

Hetihlai hian pahnihna Lebanon chuan $25,000 (Rs. 20,48,392) an dawng a, hero of the tournament atana thlan Sandesh Jhingan chuan Rs. 1,50,000 a dawng thung.

India tan World Cup beiseina

Hero Intercontinental Cup-ah India an champion a, hei vang hian FIFA ranking-a 101-na ni mek Blue Tigers hi FIFA ranking chhuak thar berah chuan top 100-ah an awm dawn - India tan World Cup kalkawng a awlsam sawt, tihna a ni tel nghal bawk.

India hian FIFA ranking-a top 100 huanga an awm hian pot 2-ah an awm thei dawn - July-ah World Cup 2026 qualifier draw hi neih a ni dawn a, Blue Tigers tan pot 2-a an awm hian group khata team ṭha awmpui hnem tamna chance a tlem chiah tihna a ni.

World Cup 2026 hi Canada, Mexico leh United States of America ten an inthlen ṭawm dawn a, team 32 inel ṭhin kha team 48-ah tihsan a ni tawh. Asia khawmualpui pawhin 4.5 hmun ruak a neih ṭhin aṭangin 8+1⁄3 hmun a nei tawh dawn.

A tlem berah ram pariat chuan Asia aṭangin World Cup an hmachhawn thei dawn tihna a ni a, Blue Tigers tan beiseina neih ngam a ni ve tawh - ram pariat hi qualifier aṭangin direct-in an tling ang a, inter-confederation playoff hmangin hmun ruak pakhatah chance a awm leh dawn bawk tihna a ni.