2023 UEFA Nations League champion Spain
Spain goalkeeper Unai Simon-a'n penalty shootout-ah vawi hnih a dang a, La Roja-in Croatia hnehin a vawi khat nan UEFA Nations League-ah an champion.
De Kuip, Rotterdam-a inkhelah minute 120 chhungin goal a lut lo. Penalty shootout hmangin chak zawk zawn a ni a, Spain 5-4 in an vannei.
A goal lo
Spain-in chance an nei hmasa zawk a, minute kuanaah Fabian Ruiz-a ball pet chu keeper Dominik Livakovic-a'n man pialin goal ban a per. Hemi per hi Álvaro Morata-a'n goal-ah pet nghal mah se Livakovic-a'n a dang hman.
La Roja an che ṭha chhunzawm a, minute 12-naah box pawn aṭanga Gavi ball pet chu goal pawnah chiah a kal. Rodri ball tauh pawh Morata lu a per hnuah a goal teuh hle.
Croatia hun a thleng a, Ivan Perisic-a ball tauh ṭha chu keeper Simon-a'n a dang. Perisic-a ball tauh vawi hnihna pawh Simon-a tan man nuam tawk chauh a ni.
Second half-ah Spain bawkin bul an ṭan ṭha a, captain Jordi Alba cross chu Marco Asensio-a'n a tauh over. Rodri pawhin box pawn aṭangin vanneih a inbeisei a, a ball pet kawh viau mah se goal zawnah a kal lo.
Barcelona forward Ansu Fati ball pet chu keeper Livakovic tan dan hman ngaihna awm lo mah se goalline aṭangin Perisic-a'n a dang. Minute 90 chhungin Spain an chungnung zawk.
Extra time-ah pawh goal a lut chuang lo a, hun chanve hma lam leh hnung lamah Dani Olmo-a'n chance ṭha a hlah ve ve.
Spain chakna Simon
Penalty hmangin chak zawk zawn a ni a, Croatia tana pet hmasa pathum Nikola Vlasic, Marcelo Brozovic leh Luka Modric ten an khung vek. Spain tana pet hmasa pali Joselu, Rodri, Mikel Merino leh Marco Asensio ten an khung ve bawk.
Croatia tana Lovro Majer ball pet chu goal kilah kal mah se keeper Unai Simon-a'n a dang hman. Mahse, Croatia tana pangana pettu Ivan Perisic-a'n keeper Simon a bum thung.
Spain tan Aymeric Laporte a rawn pen chhuak a, pet goal se chak tur an ni. Mahse, City defender Laporte hian crossbar a pet per. Spain an hlauthawng a, Simon erawh a rilru a fim sauh. Sudden death-ah Simon hian Bruno Pertkovic ball pet chu a dansak a, Dani Carvajal erawh a rawn cool viau. Real Madrid defender Carvajal hian panenka hmangin Spain chakna goal a khung.
Engtin zel?
Ballon d'Or hial dawng thei Luka Modric-a'n an ram Croatia champion puina hun ṭha a bawhpelh a, Real Madrid midfielder hian nomawi ṭhahnem tak chawi tawh mah se an ram nomawi chawipui loa football khelh chawlhsan thei dinhmunah a ding.
Croatia coach Zlatko Dalic chuan, "Spain ka lawmpui a, kan fan-te chungah ka lawm bawk. Chak zo lo mah ila, kan thlen chin erawh a chhuanawm. Minute 120 chhung theihtawp kan chhuah a, inchhirna tur ka nei lo," tiin a sawi.
Spain coach Luis de la Fuente chuan, "Europe-a team ṭha 16 an inelnaa a ṭha zual paliin semifinal an khel. Final khelh hrim hrim hi hlawhtlinna a ni a, World Cup-a pathumna ni thei Croatia hneha champion hi result ṭha a ni," tiin a sawi ve bawk.
