Mizo rawltharte an inlan dawn

AFC Under-17 Asian Cup khelh mekah India chu vawiin tlai dar 5:30 hian an inlan dawn a, Uzbekistan nen an inkhel ang - Blue Tigers hian knockout round luh an beisei dawn a nih chuan tlawm a thiang lo.

India hian an match hmasa berah game hmuhnawm bik pholangin, Vietnam chu 1-1 in an inhnehtawkpui a, an hmachhawn tur Uzbekistan hi kum 2012-ah pawh lo champion tawh an nih avangin hmachhawn châkawm an ni lo ang tih a chiang - zaninah India tan chak a ṭul.

Blue Tigers team-ah hian Mizo naupang pathum, midfielder pawimawh, Khawzawl rawlthar Vanlalpeka Guite (Sentea), Bawngkawn winger Lalpekhlua leh striker goal khung thei bik Thanglalsoun Gangte an awm a, zaninah bul ṭan vek tura beisei an ni.

Sentea leh Peka te hian Vietnam lakah bul an ṭan a, Thanglalsoun hi bench-ah dah ni mah se minute 46-naah luhtir a ni - Mizo rawlthar luh hnuah India game a inthlak danglam a, coach Bibiano Fernandes-a'n bul a ṭantir tawh ngei a rinawm.

AFC U17 draw neih a nih khan mi tam takin India hi an huphurh pui a, mahse, Blue Tigers hian semifinal luh theih an inbeisei tlat. Khawzawl rawlthar Sentea chuan, "Kan hmabaka awm team pahnih hi team ṭha tih kan hriat sa an ni a, mahse, kan hmachhawn châk tawh zawk," tiin Vanglaini a lo hrilh tawh.

January-ah khan India leh Uzbekistan te hian friendly match an lo khel tawh a, vawi khat ve ve an chak - an intawn hmasak zawkah India hian 2-0 in hnehna an chang a, a vawi hnihnaah 3-0 in an tlawm thung.

India coach Bibiano Fernandes chuan, "Uzbekistan hi team ṭha tak an ni - a hmain kan lo intum tawh a, an laka ṭha taka kan khelh theihna turin kan theihna zawng zawng kan hlan ang.

"January-a kan inhma-chhawn ai kha chuan an ṭha tawh zawk a, game dang daih a ni dawn. Mahse, kan tih ṭhat tawk lohte siam ṭhain, Uzbekistan hi bul ṭan nan kan hman theih ka beisei," a ti a, India-in beiseina an nei sang hle.