India team-ah Mizo pahnih

Mizo rawlthar pahnih Lalthlamuanpuia, Venghlui leh Daniel Lalhumthanga, Chhinga Veng te chu 19th Asian Games Hangzhou -a India aiawh tur zingah an tel dawn.

Taekwondo Federation of India chuan Asian Games khel tur zawnna hi Nadiad, Gujarat-ah a nei - June 18, Pathianni khan zawh fel niin Mizo pahnih hi an tling tih a chiang a ni.

India aiawh tur thlanna hi National Senior Championship hnuhnung bera medalist leh international player aṭanga koh an ni a. Mizo naupang pali - Lalthlamuanpuia, Daniel Lalhumthanga, H. Vanlalfela leh Hmangaihzuali te chu Poomsae huangah koh an ni. An pali zingah hian pahnih tlingin pahnih dangte erawh chu an tling zo ta lo.

Poomsae selection hi round thuma khelh tir an ni a. Round hmasa berah poomsae pahnih ṭheuh khelh tir an ni a. An point score ṭhat dan milin seeded pakhatna aṭanga 10-na siam a ni.

Thlamuanpuia'n a score ṭha ber a, seeded pakhatnaah awmin Daniel-a chu parukna a ni thung. Round hnihna chu knockout system niin seeded sang leh hniam an in tum leh vek. Thlamuanpuia hian Manipur tumin a hneh a. Daniel-a pawhin amah aia seeded sang Arunachal mi tumin a hneh bawk.

Final Round lut mi pangate hi chu poomsae pahnih ṭheuh hmangin an in el leh a. A tawp thlengin Thlamuanpuia chu pakhatna a ni a. SSCB in a dawt a, Daniela chu pathumna a ni thung.

Final result ang hian Asian Games-ah chuan Thlamuanpuia chu Individual a khel ang a. SSCB chuan Pair an khel ang. Daniel-a erawh reserve player a ni thung ang.

Thlamuanpuia leh Daniela te hi South Asian Games 2019 khan gold medal an lo la tawh a. Asian Games hma hian India ram chhung bakah ram pawnah training an nei dawn a a ni.