Mizo arm wrestler chakte an che ṭha

India rama Fitness Expo lian ber leh ropui IHFF Sheru Classic neih zawh takah Mizo arm wrestler-te chuan gold medal pathum leh bronze medal pakhat an hlawh chhuak a, champion of the champions (COC) dinhmun an luah bawk.

Inelna hi International Standard Sheru Classic niin, Benjamin Lalawmpuia, Luangmual (100kg), Denic Lalruattluanga ITI (Neihdawn) (90kg) leh V.L Zothansanga Khatla (80kg) ten gold medal an la vek a ni.

Anni pathum bakah hian Philip Lalbiakchama Hrahsel, Kanan (100kg) chuan bronze medal a la. Category hrang hranga champion ṭheuhte inelna champion of the champions huangah Denic Lalruattluanga chu a chungnung ber bawk.

Mizo arm wrestler-ten tun hnai hian India ram arm wrestling an luah hneh hle - India Arm Wrestling Federation IAF COC, India Open COC, IAF Junior COC leh All India Police COC champion laite an kawl vek.