A vawi 100 nan Red Bull an chak
Max Verstappen chuan Formula 1 Canadian Grand Prix tlan zawh takah a hmasa ber aṭanga bul ṭanin hnehna a chang a, a team Red Bull chuan car intlansiakna sang berah hian a vawi 100 nana hnehna changin mellung pawimawh an phun.
Dutch tlangval Verstappen hian intlansiak a thunun hneh hle a, harsatna lian a tawk lo. F1 huangah vawi 41 a chak tling ta chiah a, vawi thum world champion ni thei Ayrton Senna-a'n hnehna a chan zat chu a ni hrual ta chiah.
Red Bull chungnung
Tun season zet chu Red Bull el phak an awm lo, tiin kan sawi ngam awm e. Formula 1 intlansiak vawi riat an neih tawhah hnehna an la chang fai vek, an elpui team dang tan hmun an la kian lo.
Champion lai Verstappen hi vawi ruk a chak tawh a, tun hnaiah a zawnin vawi li chu pakhatna a ni. A teammate Sergio Perez chuan vawi hnih chu pakhatna dinhmun a luah ve bawk.
Kum 25 mi Verstappen chuan, "Driver ropui tak takte zingah ka hming an lam ri ve ṭhin a, ka tan chuan a lawmawm hle, chutihrualin midang nena khaikhin nih hi engtik lai mahin ka duh ngai lo.
"Kei chuan ka nihna leh thiamna angin car ka khalh ve a ni mai a, infiamna ka ngainat leh nuam tih ber a nih avangin hlim takin car ka khalh mai ṭhin," tiin a sawi.
A kum a la tam lo a, hmabak êng tak a nei mek - F1 huanga hnehna chan tam lamah hian Alain Prost, Sebastian Vettel, Michael Schumacher leh Lewis Hamilton te chauh a hmaah an awm ta.
Alonso leh Lewis
Pathianni tlai Circuit Gilles Villeneuve-a intlansiakah hian Fernando Alonso chu pahnihna a ni - Aston Martin car khalhtu hian tun season chhungin dawhsan (podium) vawi ruk a luah phak hial!
Spanish driver, world champion vawi hnih ni tawh Alonso hi season tirah kha chuan rinkai a ni phak lo. Mahse, tunah zet chuan kum 41 mi ni chungin championship table-ah pathumna dinhmun a luah avangin dah hniam a rem lo.
Mercedes car khalhtu Lewis Hamilton chu pathumnaah a thleng. Britain tlangval hian season hmasa leh kumin tir lam a hmang ṭha tawk lo, hnehna la chang chiah lo mah se tun hnaiah nasa takin hma an sawn tih a lang.
Mercedes team principal Toto Wolff chuan, "Canadian Grand Prix tlan a nih hma khan tuna kan dinhmun angah hian kan ding dawn tih min hrilh se la kan awih kher lo ang, mahse qualifying leh intlansiak pangngai kan tlan dan khan min ti lawm hle," a ti.
June thla chhungin intlansiak a awm dawn tawh lo. July 2, Pathianni zanah tun season chhunga intlansiak pakuana atan Austrian Grand Prix an tlan tlang - intlansiak karlakah team te tan insiamṭhatna hun a awm.