CONCACAF Nations League champion US

USA chuan a zawna a vawi hnih nan CONCACAF Nations League nomawi an chawi leh ta a, nimin khan final inkhelah Canada chu 2-0 in an hneh. US tan Chris Richards leh Folarin Balogun ten goal khat ve ve an khung a, Canada lamin a chhanletna tur an nei lo.

Borussia Dortmund player ṭhangduang Giovanni Reyna chuan goal pahnih hi a assist ve ve a ni - minute 12-naah a corner pet chu Crystal Palace defender Chris Richards chuan a tauh lut a, minute 22-naah Canada player-te ven hneh loh Reyna bawkin Balogun tan a siamsak.

Kum 21 mi Balogun hi Arsenal striker niin, season hmasa kha Ligue 1 club Reims lamah loan-in hun a hmang a, inelna hrang hrangah match 39 khelhsaka goal 22 khungin assist vawi thum a nei.

Ligue 1 lama a sulhnu avangin a chanchinin ngaihven a hlawh a, England leh US tan age level-ah lo inlan ve ve tawh mah se May 16, 2023 khan USA tana inlan a dilna chu pawmsak niin Nations League squad-ah telh nghal a ni - final hi ram tana match hnih a khelhna chiah niin, US tana a goal hmasa ber inkhel pawimawhah a khung nghal.

Balogun hi New York khawpuiah piangin, England-ah a seilian a, a nu leh pa hi Nigerian an nih bawk avangin ram pathum tan a inlan thei - a tawpah a pianna ram US a thlang a, tun dinhmunah chuan a tisual lo niin a lang.