Germany-ah Jorge Martin a tlan chak ber

Pramac Ducati rider Jorge Martin chuan Pathianni zana tlan zawh tak MotoGP German Grand Prix-ah hnehna a chang a, championship hmahruaitu Francesco Bagnaia hmaa a thlen theih avangin champion tum inum boruak a tinung zual.

Matin tan kartawp fuh tak chu a ni. Sachsenring tlan kawngah hian inelna tak an neih hmaa tlan ṭhin 'Sprint Race' ah pawh hnehna a chang a, intlansiak pangngaia a chak leh hian rider ṭha a nihna a nemnghet.

Spanish tlangval Martin hi awlsam taka chak erawh a ni bik lo, a bikin a tawp lam lap 10 chu na takin an inum. Pahnihna Bagnaia hnungah Johann Zarco a thleng a, dawhsana lawn pathumte hi Ducati rider vek an ni.

Inrinni tlaia Sprint Race neihah pahnihna aṭanga tlan ṭan Martin hian a hma a tlan, a hmasa ber (pole position) aṭanga tlan ṭan Bagnaia hi lap palinaah tlan pelin hnehna a chang.

Pathianni zana inelna takah pawh Bagnaia bawk a hmasa ber aṭangin a tlan ṭan a, a hma aiin a tlan pel rang zawk - lap pathumna lekah tlan pelin hnehna a chang zui ta a ni.

Kum 25 mi Martin chuan, "Season hmasa khan harsatna ka tawk hnem êm êm a, a bik takin German GP-ah hian tun hmain result ṭha neih ka harsat ṭhin, tun ṭuma ka chak ta mai hi a lawmawm zual bik.

"Intlansiak tam takah dawhsana lawn phak chin ka lo ni ve tawh ṭhin, hnehna changtu nih tak erawh thil harsa a ni. Tun ṭumah chuan engkim mai kha ka tan a fuh a, kawng engkimah ka chungnung ve niin ka hria," a ti.

Rider championship-ah Martin hian point 144 a nei ve ta a, a chunga awm leh hmahruaitu ni bawk Bagnaia nen an inthlauhna chu point 16 lekah a sawr zim ta - intlansiak pakhat lekah hmahruaitu an inthlak thei tawh dawn.

Championship hmahruaitu Bagnaia chuan, "Intlansiak nuam leh hlimawm tak a ni. Jorge ka hneh theih nan khan theihtawp ka chhuah a, ka thiam thil zawng zawng pawh ka hmang, mahse kei aiin a tlan chak zawk.

"A bik taka amah hnaih taka ka va tlan khan kei aiin a tlan fal leh thei zel, a tlan danah khan chak a phu," a ti. Intlansiak neihnaah team lam aṭanga thurawn lak aiin tlankawng chhunga an dinhmun a zira thutlukna siam a fuh a tih thu a sawi bawk a ni.