Nottingham Open champion Murray

Abdy Murray chuan a beisei ang ngeiin Wimbledon inbuatsaihna a nei ṭha hle. Pathianni zana khelh zawh tak Nottingham Open-ah Murray hian Arthur Cazaux hnehin a champion.

Kum 36 mi Murray hian hmanni lawk khan Surbiton Trophy a la, tun ṭum final-ah hian Cazuax hi 6-4, 6-4 in a hneh a, a zawnin grass court inelnaah hlawhtlinna a chang tihna a ni.

Surbiton Trophy a lak hma kha chuan, tun hnai kum sarih chhungin grass court-ah Murray hi a champion miah lo. Hliam vangin a buai nasa êm êm a, a inkhelh theih chhunah beisei a phak lo bawk.

Tunah erawh nomawi a hlawh chhuak thei leh ta a, thla thar tir aṭanga khelh tur Wimbledon atan pawh beiseina a nei sang khawp ang - grass court inelna lianah hian ṭum hnih a champion tawh a ni.

Wimbledon inbuatsaihna zinga mi Stuttgart Open-ah Frances Tiafoe a champion thung. Tiafoe hian tualchhung tlangval Jan-Lennard Struff chu 4-6, 7-6(1), 7-6(8) a hnehin nomawi a chawi.

Grass court bikah chuan a champion vawi khatna a ni a, title hlu tak a hlawh chhuah bakah hian tun kara ranking chhuak tharah chuan a sang zual 10 zingah a tel ang.

Mipa ranking sang zual 10 zingah hian United States tlangval pahnih a ruala an awm lohna a rei ta hle, kum 2011 July thla khan Mardy Fish leh Andy Roddick te an awm rual, anni hnuah Tiafoe leh Taylor Fritz te an awmdun leh dawn chiah.