Ka pa i tan a ni - Satwik

India tlangval badminton khel thiam Satwiksairaj Rankireddy leh a ṭhianpa Chirag Shetty te chuan, inelna ngaihhlut zinga mi Indonesia Open-a mipa doubles huangah gold medal an la a, hnehna an chan hnuah Satwik chuan a pa tan a hlan.

June 18, Pathianni kha Pa te ni (Father’s Day) a ni a, hemi ni tak hian Satwik leh Shetty te ṭang dun hian Aaron Chia leh Soh Wooi Yik te inkawp chu 21-17, 21-18 a hnehin an champion.

Satwik-Chirag te hi BWF World Tour Super 1000 event bikah chuan final an khelh vawi khatna a ni a, doubles world champion hneh tur hian minute 43 bak hun an mamawh lo hial.

Asian champion ni bawk Satwik chuan, "Tuna kan hlawhtlinna hi ka Pa tan a ni a, a tan ka hlan nghal bawk," a ti. A kawppui Chirag chu an hlawhtlin theih nana mi pawimawh a nih thu a sawi tel bawk.