Asian Games khel tur Sangpuia

Mizo tlangval Hmangaih-sangpuia chu karate huanga Asian Games 2023 khel turin a tling. Kawrtethawveng tlangval hi -67kg (Senior male individual kumite) huangah a khel dawn a, inelna hi September 23 aṭanga October 8 chhungin Hangzhou, China-ah neih a ni ang.

Indian National Karate Team tur thlanna hi June 19-20, 2023 khan IG Stadium, New Delhi-ah neih niin, hetah hian All Mizoram Karate Association (AMKA) chuan Sangpuia hi a tir a, a inlanna category-ah Sangpuia hi chak berin thlan a ni nghal bawk.

Sangpuia hian tun hmain national championship-ah hian medal a lo la nual tawh. Commonwealth Karate Championship 2015-ah pawh khan junior -55Kg huangah gold medal a lo la tawh a ni.

All Mizoram Karate Association (AMKA) chuan Asian Games khel tur an nei chu lawmawm an tih thu an sawi a, sum leh lai leh a ṭul ang buaipuitu Mizoram State Sports Council (MSSC) Lalrindika (MLA) chungah lawmthu an sawi.