SAFF Championship

Lianzuala telna India leh Pakistan an intawng dawn Hero Intercontinental champion nih pawh an lawm hman lo - India chuan zanin dar 7:30 hian Pakistan nen South Asian Football Federation Championships-a an match hmasa ber an khel dawn a, India hmachhawn tur hi football ram langsar ni lo mah se, ram pahnih inkar boruak avangin a 'hot' lo thei dawn lo!

India hian Pathianni zan khan Intercontinental final khelin, Lebanon chu 2-0 in an hneh a, hah pawh an sawi hman lo a, champion pawh an sawi hman lo - Thawhlehni khan SAFF inelna neihna tur hmun Bengaluru an pan lehnghal a, zaninah an inkhel lehnghal dawn.

Blue Tigers hi an fixture hautak avangin chesual thei an ni tih a chiang a, mahse, Pakistan lakah ber kher chetsual chu Indian football fan-te thinlung a dam dawn lo - zaninah zet chuan football ngaina kher lo pawhin he result hi an ngaihven dawn tih a chiang.

India star Lallianzuala Chhangte pawhin, "Pakistan hmachhawn chu a châkawm duh khawp mai. Mahse, tha kan la nei ang em, ka hre lo," tiin Vanglaini hnenah a sawi a, zaninah Igor Stimac-a'n squad a siksawi hret a nih pawhin a mak lo ang.

Pakistan an ṭha

Awih a harsa mai thei - Pakistan an ṭha, tih hi! Mahse, FIFA ranking-a 195-na ram hi an ṭha tak tak a, ranking-ah India nen inthlau viau mah se tun hnaiah Pakistan thisen kai, ram pawna khelte an lakluh nasat avangin an insiamrem lai mek a ni.

Kum 27 mi attacking midfielder Otis Khan hi League Two club Grimsby Town tana khel mek a ni a, Manchester United academy aṭanga inzir chhuak a ni bawk - ram tan match thum a khel tawh a, ven bik ngai tur a ni.

Abdul Arshad hi Danish second tier club HB Køge tana khel mek a ni a, kum 25 mi Easah Suliman hi centre back niin, Portuguese second division club Vilafranquense tan a khel mek.

Suliman hian kum 2017 khan UEFA European Under-19 Championship-ah England a lo champion pui tawh a, Aston Villa aṭanga inzir chhuak niin England U20 captain hial a lo ni tawh - Lianzuala leh Sunil Chhetri tan hmabak a awlsam dawn lo.

Mahse...

India tan thil lawmawm pakhat a awm a, chu chu he Pakistan team hi an infawmkhawmna a la rei lo a, team anga khelhchhuah an la harsat rih - tuna an squad zingah European football khel player pakua ngawt nei mah se an la inman tawk lo.

Queen Park Rangers midfielder Harun Hamid pawh hi player beiseiawm tak ni mah se ram khat rinrawl ni tur chuan tawnhriat a la ngah tawk lo a, kum 19 mi rawlthar hi India tan dan a harsa lo tura ngaih a ni.

India tana beiseina siam turin Pakistan hi 2023 Mauritius Four Nations Cup khel zo hlim an ni a, match thum an khelhah an chak lo vek - inelna thlengtu Mauritius, Djibouti leh Kenya te lakah an tlawm a, ram pathum hi FIFA ranking-a India aia hniam vek an nih avangin a thlamuanthlak angreng!

Chutihrual chuan inkhel chau India tan chetsual theih a ni, tih theihnghilh loh a ṭha a, hneh sa khelha Pakistan laka an khel a nih ngat chuan chetsual theihna an ni dawn - fimkhur a ngai e.

Chak duh Lianzuala

Nimin tlai khan India hian training an nei ve leh chauh a, Bengaluru an pan hnua training an neih leh vawi khatna chauh a ni - zaninah a harsa dawn.

Lianzuala chuan, "A hmaa kan tum ṭhin Pakistan kha an ni tawh dawn lo a, an ṭha fe tawh zawkin ka hria. An game kan thlir chinah inrintawkna an nei thar a, India nen ngat phei chuan chak an tum khawp ang.

"A hmaa kan khelh ṭhin Pakistan angrenga kan la en chuan kan tisual ang. Chuvang chuan kan rilru kan siam fel a, kan theihna zawng zawng nen kan hmachhawn a ngai dawn," tiin Vanglaini a hrilh a, Pakistan lakah chak loh a duh lo.

Intercontinental Cup-a goal hnih khungtu Lianzuala bakah hian Lalengmawia Ralte (Apuia) chu India squad-a Mizo awm mek a ni - an dam ṭhat chuan hmun pawimawh an chang zel.

A 'hot' nghal

Mauritius lama inkhela zin Pakistan hian an beisei dan chuan Pathianni khan India rawn thlen theih an inbeisei. Mahse, visa lamah harsatna an tawk a, nizan khan India an rawn thleng ve chauh - an lungawi lo hle.

Pakistan Football Federation (PFF) chuan National Sports Board lam chu an dem a, mahse, Board lam hian PFF chu a hun taka document mamawhte thehlut loah an puh thung - hun tepter tawh takah an visa tihfel a ni a, an duh angin an inbuatsaih hman a rinawm lo.

SAFF Championship 2023 hi Bengaluru-ah nghah niin, ram pariatin inelna an hmachhawn dawn - SAFF ram India, Nepal, Pakistan, Maldives, Bhutan leh Bangladesh bakah Kuwait leh Lebanon chu inelna hmachhawn tura sawm an ni.

Team pariatte hi group pahnihah ṭhen hran niin, team pali ve ve an awm a, an inkhelh kual hnuah group pahniha a sang zawk pahnih ve ve hian semifinal an lut ang. Blue Tigers hi group A-ah Kuwait, Nepal leh Pakistan te nen an awm ho.