Insiamrem theih beiseitu Alcaraz

Wimbledon inbuat-saihna an kalpui mup mup tawh a, world number 2 Carlos Alcaraz pawhin a vawi khat nan tun kara khelh tur Queen’s Club Championship a khel dawn, grass court inelna hi a tan chuan insiamrem ngaihna a ni.

Spanish tlangval Alcaraz hian clay court season a hmang ṭha - Barcelona leh Madrid Open nomawi a chawi a, mahse inelna lian French Open-ah erawh Novak Djokovic hneh loin semifinal-ah a tla.

A chawr chhuahna Spain a nih avangin Alcaraz hi clay court-ah a inkhel tam a, hard court-ah pawh a inkhel thiam, a tifiah turin US Open champion a ni thei, grass-ah erawh tournament a khelh vawi thumna tur chauh a ni dawn.

Kum 20 mi Alcaraz chuan, "Kar hmasa Inrinni khan London khawpui ka thleng tawh a, grass court-ah training ka nei. Kan inah grass kan neih loh avangin ka inkhel tam lo, chuvangin insiamrem ka ngai dawn hle.

"Chutihrualin ka beisei aiin ball ka vaw dik thei a, chuvangin tournament tak kan khelh hunah pawh ṭha taka khelh theih ka inbeisei. Hmun dang aiin fimkhur zual chu a ngai dawn tih ka hria," a ti.

Season hmasa Wimbledon-ah khan Alcaraz hian fourth round a thleng, kuminah pawh inbuatsaihna a nei ṭha a nih phawt chuan a tan thil harsa tak a awm lo tura ngaih a ni - thil awlsam tak erawh a ni hran lo ang.

Alcaraz hian French Open aṭangin Djokovic lakah world number 1 nihna a hloh a, la let tur chuan grass court season a hman ṭhat a ngai. Wimbledon hi July 3-16 chhungin All England Club, London-ah khelh a ni dawn.