England tan Arsenal star Saka-a'n hattrick a siam

Bukayo Saka chuan England tana hattrick hmasa ber a siam a, Thawhṭanni zan khan England-in Old Trafford-ah North Macedonia chu 7-0 in an sawp. Euro 2024 qualifier-ah hian Three Lions tan captain Harry Kane-a'n goal hnih a khung a, Marcus Rashford leh substitute Kalvin Phillips ten goal khat ve ve an khung bawk.

Gareth Southgate hote hi group C-ah awmin match li aṭangin point 12 an hmu a, Germany-a inelna neih tur Euro 2024 khel turin an dinhmun a ṭha hle. England hian September 9, Inrinniah Ukraine an hmachhawn leh ang.

Saka a ṭha

Arsenal forward Saka hi kum 21 mi chauh a la ni a, sulhnu erawh a nei ṭha tawh hle. Gunners tan Saka hi ṭum hnih ngawt player of the season-ah thlan a ni tawh a, first team tana season tluana a khelh hmasak berah FA Cup-ah a champion pui.

Season liam ta khan Saka hi Arsenal tan player pawimawh a ni a, hun rei zawk Premier League hmahruaitu an ni hial. Chutihrualin Saka leh a ṭhianten league nomawi chawi turin puitlin an mamawh a, England tana Saka khelh dan thlirin kawng dik an zawh mek.

Euro 2020-ah Saka telna England-in final an thleng a, World Cup-ah quarterfinal a thleng leh bawk. Euro 2024 khel tur zawnnaah Three Lions tan Saka a pawimawh zel a, North Macedonia laka a goal thum hi a ṭha vek.

First half-ah Saka hian angle awm mang lo aṭangin goal net chung lam puar pawpin a pet goal. Second half ṭantirhah Trent Alexander-Arnold ball vawrh chu Saka hian la thlain box chhung chiah aṭangin kawh zetin a pet goal a, hemi hnu hian Harry Kane-a ball fing chu Saka hian 'cool' zetin a pet goal leh bawk.

Minute 59-naah Phil Foden-a'n Saka hi a thlak a, Arsenal forward hi standing ovation an pe hial. Manager Gareth Southgate chuan, "A hlim hmel ka hmuh khan ka lawm. Team tana player pawimawh zinga mi a ni a, a inngaitlawm a, a thawkrim a, theihna a nei sang bawk. Hetiang player thawhpui hi a nuam hle a ni," tiin a fak hle.

Hei le, Three Lions

England an khel ṭha hrim hrim a, captain Kane-a'n goal hmasa ber a khung hnuah second half-ah penalty aṭangin England goal sarihna a khung leh bawk. Marcus Rashford pawhin first half tawp hma chiahin a khung a, England passing a mawi hle.

Man City tana khel pha meuh lo Kalvin Phillips pawh bench aṭangin a rawn lut a, ram tan goal a khung. England an chak chiang a, an group-ah point ruk ngawtin hma an hruai.

Chutihrualin Italy-in Nations League Finals an khelh avangin tun ṭum international break-ah match an nei lo. Azzurri hian qualifier match hnih chiah an la khel a, an match hmasa berah an mualah England an hneh lo. Group khat aṭangin pahnih an tling dawn a, Euro C'ship champion lai Italy tan kawng a la inhawng zau hle.